·        خوف خيال خطرا خامي،

·        توري تڪيو طلب تمامي،

·        آڻي وِڌا اندر حرامي،

·        لاهي ڪر سڀ فرق فناء-

·        لاَ اِل‍ہ اِلاَّ اللهُ.

·         

·        درد اندر جي دانهن، ڌڻي! رس،

·        باري! آهيان بيڪس بيوس،

·        هيڻو حال هي پاڻ کڻي پس،

·        شافي ٿي تون شهنشاه!

·        لاَ اِل‍ہ اِلاَّ اللهُ.

·         

·        ذاڪر ڪر منجهه ذات يگانا،

·        رحمت وارا کول خزانا،

·        طلب جا تَن ۾ وڄن ترانا،

·        هردم گهولج حُسن هوا-

·        لاَ اِل‍ہ اِلاَّ اللهُ.

·         

·        رهبر! رس بيراهو آهيان،

·        آس اميد تو مؤن لاهيان،

·        وارث! بيواهو آهيان،

·        راهه رلئي کي رستي لاءِ-

·        لاَ اِل‍ہ اِلاَّ اللهُ.

·         

·        زور وڙهي ٿو ديوُ دروني،

·        رهبر ڪر ڪا راهه نموني،

·        ظالم آڻي ڪٺي زبوني،

·        بڇڙي بد بلا کان بچاءِ-

·        لاَ اِل‍ہ اِلاَّ اللهُ.

·         

·        سائل آيم سائين! تو در،

·        همت حامي! وَ اسمَع وَ انظُر،

·        سمجهه صحيح ڏي ٻاهر اندر،

·        حافظ هادي! لهج سماء-

·        لاَ اِل‍ہ اِلاَّ اللهُ.

·         

·        شڪ لٿا ٿيو شعاع شهادت،

·        مطلق هڪ غفاري طاقت،

·        ”احمد“ ۾ تصديق صداقت،

·        محض محُيط سڀن تي سدا-

·        لاَ اِل‍ہ اِلاَّ اللهُ.

·         

·        صدقئون تو در سيس نوايون،

·        بخش اسان جون مير! مدايون،

·        تنهنجون لاشڪ لک ڀلايون،

·        قلب جي ڪارنهه قادر! لاهه-

·        لاَ اِل‍ہ اِلاَّ اللهُ.

·         

·        ضامن معنى صورت شامل،

·        وحدت ساڻ ٿيان مان واصل،

·        ڪرمئون ڪر ڪريما! ڪامل،

·        ساڻ صداقت قرب وڌاء-

·        لاَ اِل‍ہ اِلاَّ اللهُ.

·         

·        طلب سچيءَ جي طاقت ڏي تون،

·        غير خيال ندورا ني تون،

·        مام سندءِ جي محبت ڏي تون،

·        سڪ سچائي ڪري سُهاء-

·        لاَ اِل‍ہ اِلاَّ اللهُ.

·         

·        ظاهر تنهنجي شاهنشاهي،

·        هردم تنهنجي حڪم هلائي،

·        باطن تنهنجي رمز روائي،

·        توکي لائق سڀ ثناء-

·        لاَ اِل‍ہ اِلاَّ اللهُ.

·         

·        عين عنايت ”احمد“ تي ڪر،

·        ساڻ رضا جي رسجان رهبر!

·        هادي! هٿ حمايت جا ڌر،

·        مهرئون منهنجي مونجهه کلاءِ-

·        لاَ اِل‍ہ اِلاَّ اللهُ.

·         

·        غير نه ڄاڻڻ عين سڃاڻڻ،

·        خام خوديءَ جو خيال نه آڻڻ،

·        پنهنجو پاڻ کي پاڻ پڇاڻڻ،

·        ايها سمجهه صحيح سِکاء-

·        لاَ اِل‍ہ اِلاَّ اللهُ.

·         

·        فرق فراق فنا ڪر حالي،

·        وحدت وارو جام وصالي،

·        گهولج جلوو جان جَمالي،

·        ”احمد“ تي ٿيو عين عطا-

·        لاَ اِل‍ہ اِلاَّ اللهُ.

·         

·        قادر! تنهنجي قدرت قائم،

·        شمس قمر گرداني دائم،

·        حيرت ۾ جنّ انس وبَهائم،

·        هيبت تنهنجي هوش رُبا-

·        لاَ اِل‍ہ اِلاَّ اللهُ.

·         

·        ڪونهي تنهنجي ذات جي ڌاران،

·        هيٺ مٿي هر حال تنواران،

·        وحدت ماري پاڻ پُڪاران،

·        ريٖ اسان جي ربّ نه آهه-

·        لاَ اِل‍ه اِلاَّ اللهُ.

·         

·        ”لم يلد“ نه ڪنهن جو ڄايو،

·        مختياري مطلق صاحب رايو،

·        لا يَزال نه ڪنهن اُپايو،

·        ان جي گُهر ۾ نانهن اڙاءُ-

·        لاَ اِل‍ہ اِلاَّ اللهُ.

·         

·        معنى تون منجهه سڀ ڪنهن صورت،

·        ميّت کان حَيُّ، حَيُّ کان ميّت،

·        مام ۾ چورين مخفي مورت،

·        ”تفَعَل ماَ تُريدُ تُشاءُ“-

·        لاَ اِل‍ہ اِلاَّ اللهُ.

·         

·        ناهه سريڪ نه تنهنجو شاني،

·        تون آن باقي، باقي فاني،

·        ڪونهي ڪو ٻيو تنهنجو ثاني،

·        هي، هُو تنهنجو حڪم هلاءِ-

·        لاَ اِل‍ہ اِلاَّ اللهُ.

·         

·        ”وفي اَنفسڪم ڪيوءِ اشارو،

·        ڪوهه طور تي تنهنجو نور نظارو،

·        ”نَحنُ اَقرَبُ“ ماريوءِ نعرو،

·        واحد! تنهنجو واهه وڏاء!

·        لاَ اِل‍ہ اِلاَّ اللهُ.

·         

·        هردم هلي ٿي حال هُويت،

·        غالب غير تي ٿي محويّت،

·        منجهه هُويّت محض مَعيِتّ،

·        صوفي صافي صاف صفا-

·        لاَ اِل‍ہ اِلاَّ اللهُ.

·         

·        لاشڪ لاشريڪ شهنشاهه،

·        اُن جو حڪم هميشه بالا،

·        آمر ناهي اقرب اعلى،

·        رکي پنهنجو چاهه چلاءِ-

·        لاَ اِل‍ہ اِلاَّ اللهُ.

·         

·        اءجداء اَباء سڀ نبوّت،

·        سارا تنهنجا اهل اطاعت،

·        آل اصحاب ۽ ساري اُمّت،

·        سڀ تي رحمت ربّ وساء-

·        لاَ اِل‍ہ اِلاَّ اللهُ.

·         

·        ياور بيشڪ ڏني آ ياري،

·        اسمئون جسمئون ٿي سڀ ساري،

·        غَفرَ ”احمد“ ٿي بهاري،

·        هيڏي هوڏيِ هڪ الله-

·        لاَ اِل‍ہ اِلاَّ اللهُ.

·         

·        ”اَحمد“ جو تو شان وڌايو،

·        قربئون ڪلمي منجهه گڏايو،

·        مرسل ماڻڪ عربي آيو،

·        واهه عجائب رمز رَلاءِ-

·        لاَ اِل‍ہ اِلاَّ اللهُ.

·        لا اِلہ اِلا الله محمد رسول الله.