|
سرائڪي ڏوهيڙا
جو دم عشق الله بن جاوي سو تان محض مماتي،
پاس انفاس نه سمجهن موڳي موهي سبق صفاتي،
ٻيا سڀ سير سرابي ڄاڻڻ عاشق اسم ذاتي،
نانڪ يوسف يار سچو دا هر دم عشق حياتي.
*
يارو ياد اسان نون دل تي حيرت ڏينهن ڏهاڙي،
حيرت خيال نيتا وچ عبرت درد چروڪا چاڙهي،
عشق الله دا ازلي هوندا ٻئي مذڪور اجاڙي،
نانڪ يوسف ياف دلين نون حسن مريندا ڌاڙي.
*
مار يسي تڪبير ازلي برسر اپني بازي،
جڳ جنازه ڪر ڪي ايوين جيوين شاهه شيرازي،
هادي عشق حيات جسي دا مار جويندا غازي،
عاشق سچي جو سڃاڻن طلسم ڪوڙي بازي،
جون ڪر جڳ ڊوهي وچ حقيق مجازي،
سالڪ سمجهن عشق الله دا سارا سوز گدازي،
جو سنگ بوهي سايان ڪولي رازق پهتا راضي،
مرشد ڄاڻين پير قبول محمد شاهه درازي،
نانڪ يوسف گر ڪرپا بن سڌريا ڪوئي نه قاضي.
*
ڪي وت ڏينهن ڄمڻ دي آهي لڳڙا عشق چروڪا،
دم اهو دل دائم ازلي پنجين سال پروڪا،
ماهه سجن دو ماهه اسان ها پنجوان شمس جهروڪا،
کول ويکو فرقا نون تم ني مياني ڪوءن اروڪا،
نانڪ يوسف ياري ڪلما ايڪو ايڪ ڀروڪا.
*
عاشق هادي دي ڌمان لايان زوران زور پساري،
آپن آپي اناالحق دي ويک مريندا نعري،
آپي اپنا حڪم هليندا شاهه برهه چوڌاري،
آپي چڙهي ديس لٽيندا عشقا سچ سچاري،
هلان هل ٿئي فوجان ڏيون روز اماري،
مرشد مالڪ نبي محمد چڙهي چارئي چاري،
نانڪ يوسف شاهي سترهن سخن سچو سچ ڌاري.
*
اکيان ڪاري ڪيبر ڪاٽي جهوڙيان حوهون مارن،
گرد غبار گرزي توبان عاشق سر او مارن،
مار جويندي يار لقائي ڊوبتيان ڦر تارن،
لاون توڙ نڀاون سهڻي ڪٽيان دلين اجارن،
نانڪ يوسف يار مئن گولي عشقي وچ خمارن.
*
اکيان نال اکين دي اٽڪن اکيان ستم ڪماون،
ڌيانون ڌيانون اڳوهان جيڏي پير پڇون نا پاون،
سهڻيان ديان وهه سهڻي ڪيفي ڀوريان هر جا ڀاون،
بانوريان تي پانوريان واهه سانوريان سمجهاون،
نانڪ يوسف مئن نا ديدان ياران يار ويکاون.
*
نينان ڪيهي حڪم هلاون واهه اکيان دي چالي،
حيرت عبرت خيال آهين وچ سمجهن عاشق حالي،
ڪڏ هوشيار ڪڏان مدهوشي مستومست خيالي،
نانڪ يوسف عشق الله وچ عاشق ڦرن اڪالي.
*
اکيان عشق الله دي واليان مخموري مستانيان
هوش ڪنان بيهوشي هوون دانهه در ديوانيان،
اپني غرض خيال جو ڦرديان اصلي هن اخوانيان،
سوء سوء لک سجود انهان نون صاحب هن سلطانيان،
نانڪ يوسف يار اکين دي دست تهين دستانيان.
*
اکيان ڳجهڙي ڳالهه اندر وچ ڪيهي ڳالهه ڪريجي،
ڳجهڙي ڳمڙهي رمز اکين دي چوري چلس چکيجي،
بيدردان نون ڳالهه نه ڏسيجي اندر لوح لکيجي،
نانڪ يوسف يار دي محبت اندر روح رکيجي.
*
اکيان نال اکين دي جهڙي اکيان ڦر ڦر پرچن،
اکيان نال اکين هن هسدين رو رو ورهه نه ورچن،
نانڪ يوسف يار ديان اکيان ڏاڍي ڏک سين سرچن.
*
ڀاءُ ڀرائي ڇوڙڪي جاندي دلبر نا ڇڏ جاسي،
سختي ويلي سست نه ٿيندي عاشق يار پياسي،
جا آوي سرسائي خوشرو رهندي دوست اداسي،
من رضا وچ کڙدي عاشق ڳالهه اها ها خاصي،
نانڪ يوسف يار هميشه هڪ دلبر دل پر رهسي.
*
تيرا عشق محبت هادي دل تي روز چهيندا،
ظاهر باطن هين تن روشن ڪوئي نه يار ڪهيندا،
خفي اخنهيٰ تونين وسدا مالڪ ملڪ مهيندا،
يڪدل يار اسان نون تيرا سخن سچا اکيندا،
نانڪ يوسف در تو ڪائا غرض نه جهين ڪهين دا.
غرض هڪو هڪ دلبر تيرا اوران غرض نه ڪائي،
عالم عقل صلاحان ڏيندا وتن چولي چائي،
وحدت دي اسراري دي اصلون ڪوران خبر نه ڪائي،
غير خيال سڙي وچ وحدت عشق آتش جڏان لائي،
يوسف يار لڻيندا هڪو هادي برهه سدائي.
*
سانون هادي يار سڃاتا لوڪان ڪيهي ٻجهي،
غيرت والي غيرت ٻوڙي بيدردي نه سمجهي،
عشق نغارا نينهن مريندا غرض نه ڪنهن دي ڪجهي،
نانڪ يوسف يار يارانا هڪو هردي مجهي.
*
دل درازين محبت سچي يارو وڃ وڪائي،
روشن خيال ميرا هر دلبر آکڻ ڪيا ڪهاڻي،
بازيان ويک برهه ديان ڦرڪي مئن دل ڦري نماڻي،
رو رو حيرت حال دليندا وهندا پريت پاڻي،
واحد وحد وحيدوءن هڪو ڏٺم عين آريائي،
نانڪ يوسف يار بنا ٻي ياري ڪوڙ ڪهاڻي.
*
هڪو هادي پڪڙليو سي محرم يار دلين دا،
هر عاشق تان ڍر مرشد اور نه خيال چلبندا،
ڪاڻ تماشي سر عشقان دلبر خلق کليندا،
نانڪ يوسف يار تان صدقي ڪم نه هل مليندا.
*
جنهن دي دل جهين ڏي جاوي صورت اس دي ليندا،
جو عشق جنهن صورت وچ هوسين گم اهين وچ ٿيندا،
سهڻي صورت مرشد والي ٻيا سڀ ڏک ڏسيندا،
جنهن صورت خيال غير هن موت نهوراس نيندا،
يوسف يار بنا ٻي صورت چٽ فريب دلين دا.
*
يار بنا ٻي صورت مورت سوء لک سهڻي هووي،
بازيگر بڻائي بازي اسي ڳل جو دل سووي،
آپون آپ ڪريندا بيزاري رات ڏينهان رت رووي،
نانڪ نينهن اڻانگي بازي جان دل هڪو هووي.
*
دم دلبر ديدار بنا دل ماندي ٿي ٿڙڦندي،
سوز ڪنون نت ڪري پڪاران ڳڻ ڳانڍي غم کاندي،
يار بنا ٻي ٽار نه ڀانوس ڀاندي ڳالهه ڏکاندي،
نانڪ يوسف يار دي هان مئن باندي خاڪ پيراندي.
*
دم ديوچ دم هليندا طالب رک سنڀالا،
نا اٿ ورد وظيفا روزا نه ڪوئي نماز مسالا،
نا اٿ عمل علم دعوتي نا وت درجا اعلي،
نا اٿ عابد زاهد زهدي پيون مست پيالا،
عاصي سڀ ڪم اجائي ڪرندي نينهن بن منهن ڪالا،
يوسف يار سچي دردي هادي نانڪ نانءُ نه نالا.
*
دنيا دين ايمان خلق دا دنيا خلق خرابي،
طالب دنيا درس مخث مسئلا ويک ڪتابي،
طالب عقبي عين مونث ڪوڙا سير سرابي،
عاشق مرد مولي مزڪر دو جڳ شور شرابي.
*
زلف سياهه سياهون ڦٽي شمس نه تاب انيندا،
سوء يوسف لک مصري هوون ڪيا ڪورس بنيندا،
ارض سما ستاري رم جهم بجلي گهور گهميندا،
نانڪ يوسف اڳون منهن فلڪ ٻلڪ ٻهون شرميندا.
*
ڪوءن هووي تل يار ميڏي دا ڍونڍيم جسم جهانون،
عشق اويڙا اندر وچ اصلي ڏيندا هجر بيانون،
راحت روح رهاڻ ڏکاندي ڀالين دور ڳيانون،
نانڪ نيهن سچي گهنڊ کوليا يوسف يار ميانون.
*
هر دم عشق حيات ڏٺوسي هادي مهدي والا،
توڙي لک هزار ڪنابان پڙهه ڪي ٿيون عالم اعلي،
بزرگ دانشمند ڪهاون بڙا سڏاوين بالا،
وتين ڳوليندا مرگ اجل نون نينهن نه سمجهن نالا،
عشق امام نه ڪري ازل دا نه ڪوئي دم سنڀالا،
نانڪ يوسف يار دي محبت سچا دل تسلا.
*
الٽي بات برهه ڪي ڀائي الٽي ٻوجهه ٻجهاوڻ هي،
جنهن دل کولي صفا ڪيتي تهن دل مقصد پاوڻ هي،
بيخودي خود هڪو هووي ذتي راهه ڪماوڻ هي،
ٻاجهون درد گداز ربي دي ٻيا سڀ سير ڀنواوڻ هي،
نانڪ يوسف يار ديان ٻوليان اناالحق الاوڻ هي.
*
ڪي وت روز اسان نون دل تي بابا دادا قاضي،
مسئلا قال مسئل ڪردي استقبالي ماضي،
دم اسي هم دل اساڏي رتي نه آهي راضي،
ڪياجي دين مذاهب قاضيان ناهي خوش بيراضي،
نانڪ يوسف يار ميري دل سچا سخن ايازي.
*
يارو ياد رکيجي دل تي دم دم دم الله دا،
ڀولا ويک صفات نه ڀلين سير ويکين قهه قهه دا،
آپ ڪرين گم سري وچ عاشق سوز نگهه دا،
نانڪ يوسف درد لڳو هان شهه دي اندر شهه دا.
*
ڳالهه ڳجهي جا اصلوءن والي يارو ياد ڪريجي،
انفسڪم سڻ اهو واشارا موتو قبل مريجي،
ميم محيط رهڻ هر شئي وچ سمجهڻ رمز ڌريجي،
ثابت ذات ربي رک نالي هستي ماڻ هريجي،
نانڪ يوسف يار هڪودم دلبر ديد ٻريجي.
*
جي تون عاشق عاشق الله دا برهون چا بدنامي،
نا اٿ ورد وظيفا روزا ڪفر نڪو اسلامي،
بار ملامت محبت والا برهون توڙ نمامي،
نانڪ يوسف خاڪ ڳلي رهه دلبر مست مدامي.
*
دلبر دا هڪ درد اهوئي عاشق چاڪر چاڪر،
هر کيا دل ڏٺا در نيان فرمان چاڪر چاڪر،
پير مغان فرمايا يارا حق حق چاڪر چاڪر،
نانڪ يوسف نيڻ نماڻي هرڪس چاڪر چاڪر.
*
رهه مسڪين تي ڪيا غمگين هادي هردم راضي،
رام رحيم ڪريم قديمي صاحب دوست درازي،
جو آندا سو مقصد پاندا محبت سوز گدازي،
دم غنمبت هوش هوشياري هي جڳ غفلت بازي،
نانڪ يوسف ياد اسان نون يارا سخن ايازي.
*
عاشق عشق ملامت چاوڻ ڪم ڪنا هان ٿولي،
سئو سئو دجلا دهشت راهه وچ گرنا گوني ڇولي،
هڪ غيبي ڪيئي ظاهر دي وچ عشق الول الولي،
ٻاجهوءن ٻاجهه مرشد اپني دور رهن سڀ رولي،
نانڪ يوسف نيڻان حياتي ڦولي ناهين اولي.
*
نازون نيڻ نواز ڪريندي عاشق ويک نيازي،
حال عليمي دردمندان دل دم دم سوز گدازي،
ترس ڪريندي سر يتيمان دانهه دوست درازي،
نانڪ يوسف يار دي ياري برها برهي بازي.
*
چاڪ ڪيتي دل ڪملي ميري چاڪ ميهين دل چڪي،
يا رب ميل مهوال ميهين دا ساهه جهين دي سڪي،
نال هڪي هڪ تانگهه لڳينسي سر دا سائين هڪي،
کيڙي ڀيڙي مل مهين نون ويڻ الاون ڦڪي،
يوسف يار دي نال جاليسون توڙي ڪرن تڪي.
*
مست اکين محبوبان ديان وت ڪيهي ڳالهه ڪريجي،
ويکڻ حسن حڪايت سهڻي موتو قبل مريجي،
يوسف حاضر يار سجن دي نانڪ دور ڌريجي.
*
اکيان پيتي جام محبت مرشد مالڪ والي،
ابرو تير ڪمان مرگان ڪوءن انهان نون ٽالي،
سرخي نال سفيدي سهڻي سبز مسي سياهه ڪالي،
ابرو تيغ بهادر ڀونري ڀون ڀون ڪرن بحالي،
رم جهم زلف اتي رخساران ڇالي ٻر ٻر والي،
يوسف سهڻا يار حسن دا مستو مست خيالي.
*
اکيان اکيان جهيڙا ڪيها چارئي هڪي ٿيون،
جام شراب وحدت والا پيالا پر ڪر پيون،
رلمل زمز آهين وچ عاشق چاڪ سيني دا سيون،
نانڪ يوسف يار هميشه ويک معشوقان جيون.
*
اکيان نال اکيان ڏاڍي ڪذربان ماڻي ٽاڻي،
عاشق تي معشوق اهوئي ويک اکين وچ واڻي،
ديدان دم درياه الله دا نرمل نور سڃاڻي،
صاف سونهين وچ اکيان مرشد مولا پاڪ پڇاڻي،
نانڪ يوسف يار الله دا عشق ڳلان حق آڻي.
*
ديدان دا هڪ چنبا ديکا عشق دي ڪرن ڪمائي،
هر دو طرفون عاشق ٿيون ڪفر اسلاموءن جائي،
ڏوهه ثوابون نرمل رهنديان سهڻيان واهه صفائي،
نانڪ يوسف يار ديان رمزان سمجهه ڪنان ڳل آئي.
*
رمزان راهه جنهين نون مرشد سچي آ سمجهايا،
واحد احد الله دي محبت سرڪا صاف پلايا،
طالب خير تحقيق تنهن تون در جنهين دل چايا،
نانڪ يوسف يار الله دا ٻولي عشق سجايا.
*
عشق ته ساڏي ڏکان ڏي سر ميڏي ساٿ لڙائي،
پهن ڪي مرچي ڏيون هرچي فوج حسن ڪرائي،
ڪيون وصال هجر دل پايا سولان بار سهائي،
نانڪ يوسف وصال چهيندا دردان دوست ملائي.
*
اکيان عشقوءن ستم ڪماون پاڻ اکين دي ساچي،
مارن سيني جهل عشاقان مرگان تير تماچي،
اکيان ڪرن شڪار اکين دا ڪوءن انهان ٿو باچي،
يوسف اکيان انت نه پايا ڪو محبت وچ ماچي.
*
اکيان باز ڪبوتر دل نون چنگل مارن جهٽڪي،
کاون ماس ته پيون لوهو هيٺان ڪليجا پٽڪي،
چارئي طرفون فتح ڪريندي نين سپاهي اٽڪي،
يوسف يار دي چشمان چاي موهن موهن لٽڪي.
*
مست اکين معشوقان ديان وهه شمع شراب نياري،
شور وچي مخمور سدائين مستو مست متاري،
البيليان دي ڪيف ڪڪوري برهون باغ بهاري،
يوسف يار نيڻان دي ويکڻ سوء سوء صدقي واري.
اکيان بحر برهه دي اندر ٽٻ ٽٻ غوطي کاون،
ماٽي جسم جهان وسارن بير اڳون هان پاون،
قلزم ڪارونڀار وچالي موتي چڻ چڻ چاون،
يوسف يار فراق اکين نون ويکن درد ڀراون.
*
اکيان ڪو جو درد پرايا دم دم بي اختياري،
هنجون هار فراق هميشه زاري هئه هئه زاري،
شهدي نين عشاقان معشوقان دي مست شڪاري،
درد مندان سر فوجان چاڙهن محبت خيال خماري،
يوسف اکيان روشن رهبر ويکڻ دي بکيري.
*
عشق بهار بهاري عشفوءن جي سر تي چم چاندي،
طالب درد سجن دا جوئي درد انهن تون ڀاندي،
جنهن دردوءن حق ڪينا حاصل او ڳالهه ڏکاندي ڳاندي،
جا آهي سرسائي سهندي ناثيرن در ماندي،
يوسف درد الله دا چاهي هور نه ڪو غم کاندي.
*
رو رو ڪانگ ڏکاندي اکيان يار سڄڻ دل گهاين،
هنجون هار قطار ڪونجان دي ڇوهوءن جنڪري ڇلين،
پانڌيان نون پيرين پوندي آنديان تليان مليان،
يار يوسف دي عيبانه ڦولين واسطي رب دي ٽيلن.
*
عشق تساڏي عقل وساريا ڀول ڳيان تدبيران،
جنهن سر آيا سا دل ڄائي سوز ڪريندا سيران،
بي اختيار بي راڳي برها نهين ڪائي بات نظير ان،
عشق تيرا بادشاهه دليندا ڪي ڪجهه وس ورڍان،
يوسف سچي ياري تساڏي ياري حق فقيران.
*
اکيان ناز اکين دي نالي پهنن پرچن ميڙي،
ماڻ محبت ٿان بنيديان برهوءن ڪرن بکيڙي.
هسديان ورنديان آپس دي وچ ڏيون عشق اويڙي،
نانڪ يوسف يار ديان ديندان نحن اقرب نيڙي.
*
نحن اقرب ٿون يار ديان ديدان هردم وسديان ڪولي،
اکيان ٿون روشنائي رب دي لوڪ ڀليا وچ ڀولي،
عاشق عاشق هادي دل وچ غيب الله دا ٻولي،
يوسف يار اکيان وچ سهڻا وسدا آپ نه اولي.
*
عيان عاشق دل وچ ديدان مرشد مالڪ واليان،
پيچ اکين وچ اپنيان ويکين دست انهان دواليان،
ديدان مست دوني دم هادي رم جهم رمز نراليان،
ويکڻ فيض ديدار انهان دا چال سهڻي سوء چاليان،
جنهن ڏٺڙيان سو محڪم قابو وچ زلف جهل جهاليان،
جڳ مڳ جهور جهڪور نيڻان دي آپ آپس وچ ڪاليان،
نانڪ يوسف يار ديان اکيان ڏيک اهي ڏک واليان.
*
اکيان عشق الله دا لڳڙا ٻيا ڪيا غرض ڪهيندا،
هرڪو مطلب اپني والا يار اشا وکيندا،
نال طمع دي پياري ياري هس هس يار سڏيندا،
ڀولي لوڪ وچي جڳ سارا ڪلمي ڪوڙ ڀريندا،
هڪ ٻيئ نال يار نا طمعي ڳهلا لوڪ رکيندا،
يوسف بيپرواهه فقير هي دو جڳ عشق اليندا.
*
اکيان وچ اسرار الله دا ڏک واليان دي ڏولي،
درد جنهان دي دل تي وارد قدمان تنهان اتون گهولي،
اصلوءن روح سڻي ازلئون عشق جنهن دي ٻُولي،
يوسف يار اسم وچ گم دم هردي اندر هولي.
*
اکيان ويک جمال جلالون درد بهاري پرسن،
روڪن رمزان رمزين اندر ڏک دل ويک نه ترسن،
غرقان بي وچ لعل تي هيري ويکن وهه وهه درسن،
يوسف يار سبئي پڙ کٽسن جي ڳلي معشوقان مرسن.
*
اکيان تانگهه اوڏاهين لائي راتيان ڏينهان لوري،
رورو سڪدي سوز ڪنون نت نيڻ هريندي هوري،
مهروءن ڀال ڪريندي سهڻي نيڻ محبوب اگهوري،
يوسف يار ازل دي روزوءن دام زلف ڳل ڏوري.
*
اکيان دي فرياد اکين نون اکيان مرشد هادي،
ڪرن هدايت بيرحمان تون ڏيون دم دم شادي،
محبت مستي جام پليدي وحدت وچون وادي،
ڪوڙين ڪرم ڪرن مڙ ڀائن غيوءن ڪر آزادي،
يوسف اکيان عشقوءن روشن يارا قسم خدا دي.
*
نوري نيڻ عشاقاڻ دا سر ڪيهي فوج چڙهيندي،
ٻڌڪي مرچي تير تغگان کوڙ نيشان کڙيندي،
ابرو حلقي ڪڍ ڪڍ غاشان جوڙڪي جنگ اڙيندي،
عاشق اڇلن سر اتاهين ترس نه تل ڪريدي.
يوسف سحر اکين دي ڪاري قابو قيد ڀڙيندي.
*
اکيان دل ول تانگهه اوڏاهين جو سر اکيان ڏٺا،
شوق نهين دل هور ڪهيندا بن مرشد محبت مٺا،
حسن بيرنگ رنگيلا هر جا سوء سوء ڪاتب چٺا،
يوسف يار دا نقش ميري دل لکيا ايڪو ڪٺا.
*
اکيان گم اکين وچ هونديان اپني هستي هٽڪي،
اکين نال اکين دي عشوءن چهه چهه ڏيون چٽڪي،
انت اکين دا ڪنهين نه پايا چال چلن لک لٽڪي،
اکيان آپ وسار انهان وچ اکيان اون هٽڪي،
يوسف يار اکين نت روشن عشق کڙا پڙ کٽڪي.
*
اکيان دا احسان ڇهيندا مرشد مهر سدائي،
نور محمد هادي هردم اکيان دي روشائي،
اکيان نال ويکان پلپل وچ نرمل نور صفائي،
سوز اکين نون محبت مولا نينان سور سهائي،
يوسف يار ٿو مهر منگي دل ديد نگاهه سوائي.
*
نظر مهر دي مسڪيان تي مولا مرشد ڀالي،
نينون نور جهيندا روشن جل نل ڏيندا جهالي،
شمع شعاع زيادهه شمسوءن جبر جمال جلالي،
دامن لڳڙي دا ننگ تيون صاحب قرب ڪمائي،
يوسف شهر دراري دي در تي ڪرندا درد ڌمائي.
*
يارو عشق شراب ڪتون اوڪوءن جو منع ڪريندا؟
چارئي يار اصحاب محمد اپ ايوين فرميندا،
عشق آيا سر آپ محمد چوچڪ فيض ڪريدا،
خفيه سر اسرار تي هو يا گنهگار تريندا،
سو هو سي وچ جنت هردم ڪلمه حق پڙهيندا،
نانڪ يوسف صدقا اس تون ج اپني پاس ڌريندا.
*
جي تون پوڇين يار مهين ٿون عشق دي ڪيهي جهولي،
ڪڏهان دانهه در دلائل ڪڏهان عقلئون ڀولي،
ڪڏهان مست خيالي خستا ڪڏهان بيخود ٻولي،
ڪڏهان ڏوهه ثواب ڪفر وچ ڪڏهان دين الولي،
ڪڏهان سوليءَ سير نظارا انا الحق پيا ٻولي،
پيرنگ باتان نانڪ يوسف هرجا يار نه اولي.
*
ڳوڙهي ڳوڙهي نيڻ برهه دي ڳوڙهي ڪرن لڙئي،
ڳجهڙي ڳجهڙي ڳالهه نيسان دي سهڻي چال خدائي،
ڪيا وت ڪيڪ خراسان آسي ڪيا طائوس توائي،
ڪيا وت گينور شير جهنگل دي آهو ڪوءن هوائي،
نانڪ يوسف سڀ صورت پر يار دا جوڙ نه ڪائي.
*
هجر فراق ساڏي ماري رات ڏينهان غم کاوان
ورهه وسلوان،
سهجئون سهج تساڏي آوڻ چولي مول نه ماوان
سهري ڳاوان،
چاهه سچي دل چاهي ميري تو ول آوان
ڪول ڪماوان،
يوسف يار سڻيجين توهين تيرا نام من وچ باوان
ساهه سياوان،
*
عشق هويا بادشاهه دليندا حسن چنهين دا ماري،
فوجان فوج حسن دي دل تي لڙدي نين شڪاري.
زلف دلين تون قيد ڪريندي ڪنڍي ڪيبر ڪاري،
يوسف يار سڄڻ دي در تي ڪيئي عاشق هن ٻلهاري.
نيڻان نال لڙائي نيڻان عشقئون واهه اٽڪائي،
حسن هزاري فوج سواري آون واڳان چائي،
سيني ڍوڻ ڍال عشاقان حاضر ڪرن سدائي،
يوسف ياري يار سڄڻ دي ٻي سڀ ڪوڙ ڪمائي.
*
عشق الله دي هيبت شاهي جاري حڪم ربانا،
ڪل يوء هو في شان سڻ بيرنگي سلطانا،
ماڪ ملڪ دلين دا آپي آپي شاهه شهانا،
بيرنگ رنگي بات برهه دي خانا سوء سوء خانا،
ڪيئي عاشق عشق نهوڙي دانهه مست ديوانا،
هي اسرار اواگهه اللهي ڪيا ڄاڻن ملوانا،
يوسف يار برهه دي نالي زاري لک لک جانا.
*
عشق الله دي ڳالهه نه منيندي سي موڳي مرواني،
خارج خام خيث حرامي ڄائي خر خراني،
سي وچ ڪوڙ ڪميني دو جڳ حارص وچ حيراني،
قدر عشاقان عاشق ڄاڻن مرد الله اخواني،
يوسف يار چهيندا هڪو هم خاني دل جاني.
*
يارو عشق الله ديان ڳالهين آپن عشق آکيندا،
لک هزار ديوچ ڪوئي برهه لات لکيندا،
جنهن دل مرشد نال محبت مئي دا جام چکيندا،
برهه بيرنگي جنهن دل آندا اپني رمز رکيندا،
اپان حڪم هلائي سارا شاهي نام ڌريندا،
يوسف يار دا هڪو نقطه لکيا ترڪ ڪريندا.
*
زوران زوري فوج برهه دي سر عشاقان اصلي،
مرگان مرچي ڏيون هرچي ڪرڪي آون حملي،
سهڻيان دي سڀ ويکين سهڻي سر معشوقان شملي،
گهمر گهير اوڙيڙا اندر وچ عشق مريندا گهملي،
يوسف يار جو دم حياتي پير محبوبن چملي.
سهڻي زلف معشوقان دي وهه مئن دل اٽڪي چٽڪي،
ڪنڍي ڪاري پيچ ولو ول آڪر اٽڪي ماڪي
ڪوءن انهان نون موڙي هوڙي ڏيون سٽڪي جهٽڪي،
يوسف زلفان جام جنهين دل سا ڪين ڦٽڪي نٽڪي.
*
بخشڻهار توهين بخشيندا لک بديان بدڪاران نون،
تو بن اور نه پڇدا ڪوئي غافل گنهگاران نون،
لاتفنطو سچا ڀرواسا هي غافل گنهگاران نون،
نانڪ يوسف رحم رب دا هووي دامن دا ننگ ياران نون.
*
اندر ٻاهر الله ٻولي ڪٿ خلق فلانا ٻولي،
هم هويا گم الله ديوچ الله آيا اندر چولي،
جوڳي جوڙڪي مرلي آيا ڳالهه اها واهه ڳولي،
سير دا نام وڃا ڪرو سير ڪرو چا تولي،
سير ترازو تولڻ وائي تئين مئن ٽڪڙي ٽولي،
تولي وچون سير ٿيا يوسف ڦردا ٻولي.
*
عشق جيهابي حجاب نه ڪوئي دل نون چنگل مار ٻهاري،
مار منجها ڪي ڏي دلاسا بازر وچ رلاوي،
يوسف ٿي قربان تنهان تون جنهان ايڏي ستم سهاوي.
*
آپ وچون ڪر پاسي عاشق سار ٽٻي وچ شهدي،
ٿي غواص ويندي وچ وحدت طالب عشق الله دي،
ڪٿ نه قدم چاون رمزاهين وچ رهدي،
نانڪ يوسف يار ملدي وچ ديوار قهه قهه دي.
*
قهه قهه ڀن ديوار دوئي دي جهين جڳ ڀلايا،
ڪوڙا حرص هوا ۽ تڪبر ڌنڌا عقل اجايا،
نانڪ يوسف برهه بنا ڪوئي پنڌ نه ٻيا سجايا.
*
اکيان سر اواگهه الاهي اکيان نور خدائي،
اکيان موج محمد نياري اکيان دي بادشاهي،
اکيان فلڪمن ملڪين روشن اکيان دي روشنائي،
اکيان ڪن فيڪون بنايا اکيان ڪثرت پائي،
اکيان نانڪ يوسف اکيان رمز رلائي.
*
الکون الک بنائي الفي مورت سير نظارا،
ڀريان گل ڦل چوڪڙيان واهه ويکين رنگ نيارا،
نفي اثبات ثبوتون هادي الا الله نقارا،
انا احمد بلا ميم ڪهندا دوست پيارا،
نانڪ يوسف يار او تاري آتا بن بن اپارا.
*
عاشق عشقئون معشوقان غمزي نال گذارن،
ساس اداس پياس پيتم ڪي رو رو هنجون هارن،
در در دل ديواني ڦردي سهري عشق اوسارن،
نانڪ يوسف يار بنا ٻيا خيال خناس اتارن.
*
نال دليلين ساٿ لڏيندي سمجهڻ مشڪل بازي،
وحدت ڪثرت هڪو نقطه دم مريندي غازي،
ٻاجهوءن درد نه وحدت واصل بنا سوز گدازي،
نانڪ يوسف يار سڄڻ دي عشق هونديان دل راضي.
|
