غَزَلُ نَمبرُ 16

”حَمۡدِ بَارِيۡ تَعَاليٰ“

حَمۡدَ جوۡ لَائِقُ هَميۡشه، صَانِعِ اَفۡلَاڪُ آهِ!!
جَنۡهِنۡ عَطَا اِنۡسَانَ کيۡ ڪئو، عَقُلُ ۽ اِدۡرَاڪُ آههِ،
شَانُ آهيۡ اُنۡجو اَعۡليٰ، بَادِشَاهِيۡ ٿِيۡ بَلَنۡدُ!!
ذَاتِ اُنَجِيۡ ٿِي وَڏِيۡ ۽، ذاتِ اُن جِيۡ پَاڪَ آهِ،
پَاڪُ پَالَڻهَارُ آهيۡ، سَارَ سَڀَ جِيۡ ٿو لَهيۡ!!
۽ مَٿَانۡ مَاڻُهِنِ وِڌيِۡ، پَرَوَرَ چَڱِيۡ پوۡشَاڪَ آهِ،
جيۡڪِيۡ آ دُنِيَا وَمَا فِيۡهَا ۾، سوۡ اُنَجوۡ سَڀَئِيۡ!!
اُنَجِيۡ سَڀِ آهيۡ عِنايَتَ، اُنَجِيۡ سَڀِ اِمۡلَاڪَ آهِ،
اُنَ مُحَمَّدَؐ کيۡ مُڪوۡ، رَحۡمَتَ جَهَانَنِ جِيۡ ڪَريۡ!!
عَرۡشَ توۡڻيۡ فَرۡشَ تيۡ، هَرۡ جَاءِ هُنَجِيۡ هَاڪَ آه،
سَيَّدُالۡثَقَلَيۡنَ جوۡ اُنکَيۡ، ڏِنَئيۡن سُهۡڻونۡ لَقَبۡ!!
سَرَوَرِ ڪوۡنَيۡنَ سَيّدُ، صَاحِبِ لوۡلَاڪَ آهِ،
اُنَ جِيۡ مَسۡجِدۡ پَاڪَ ۾ جَنۡهِنۡ، پَاڪَ روۡضيۡ کيۡ ڏِٺوۡ!!
سوۡ جُدَائِيۡ ۾ هَميۡشَه، غَمۡزَدَه غَمۡنَاڪُ آهِ،
ذِڪۡرُ اُنجوۡ قَلۡبَ جِيۡ قُوَّتَ، ۽ رَاحتَ رُوح جِيۡ!!
هِجۡرَ ۾ دِلِ دَرۡدَ وَارِيۡ، اَکِ سَدَا نَمۡنَاڪَ آهِ،
ڇوۡ نَه ٿو سَائِلَ سُڃَاڻِيۡ، ڪِيۡمِيَا ۽ سِيۡمِيَا،
ڪِيۡمِيَا جَنۡهِنۡ کيۡ چَوَنِ سَا، اُنَجيۡ دَرَ جِيۡ خَاڪِ آه،

 

غَزَلُ نَمبَرُ 17

”اِلۡتِجَا بَدَرۡگَاهِ ايۡزَدِيۡ“

خُدَايَا ڪَرَمُ ڪَرِ پَنۡهِنجو تُوۡن، پَنهِنۡجِيۡ شَانَ جيۡ صَدۡقيۡ!!
رَسُولُؐ الله جِيۡ رُتِبيۡ عِزَتَ، ۽ مَانَ جيۡ صَدۡقيۡ،
اَسَانۡکيۡ دِيۡن ۽ دُنِيَا ۾ تُون، عِزَتَ آبِرُوءَ سَانۡ رَکُ!!
عَطَا ڪَرۡ عِلۡمُ اَحَسَنُ توُنۡ، علۡمَ عِرۡفَانَ جيۡ صَدۡقيۡ،
اَسَانۡکيۡ بَخۡشِ دوۡلَتَ دِيۡنَ، ۽ اِيۡمَانَ جِيۡ هِتِ هُتِ!!
بَچَائِج شِرۡڪَ بِدۡعَتَ کَانۡ، سَچيۡ اِيۡمَانَ جيۡ صَدۡقيۡ،
اِلٰهِيۡ عِلۡمُ ڏيۡ نَافِعُ، طَرِيۡقَتَ جَا ٿِيُونۡ تَابِعَ!!
حَقِيۡقَتَ مَعَرۡفَتَ حَاصۡلُ، شَرِيۡعَتَ شَانَ جيۡ صَدۡقيۡ،
ڇَڏَائيۡ حُبَّ دُنۡيَا جِيۡ، عَطَا عُقۡبيٰ جِيۡ اُلۡفَتَ ڪَرۡ!!
مُحَبَّتَ پَنۡهَنۡجِيۡ ڏيۡ موۡلَا، تُوۡن پَنۡهِنۡجيۡ مَانَ جيۡ صَدۡقيۡ،
بَچَائيۡ بَاهِ دوۡزَخَ کَانۡ، عَطَا ڪَرۡ جَنّتُ الۡمَاوَا!!
ڪَرَم ڪَرۡ ڪُلَّ عَالَمَ تيۡ، ڪَرَمَ اَحسَانَ جيۡ صَدۡقيۡ،
عَدَاوَتَ کَانۡ ڪَريۡ آجوۡ، ڇَڏَائيۡ حَسَدَ ڪِيۡنيۡ کان!!
وِڃَائِج حِرۡصَ حَيۡوَانِيۡ، شَرفَ اِنۡسَانَ جيۡ صَدۡقيۡ،
ڪَرۡيُوۡنۡ ٿَا عَرَضُ تُنۡهِنۡجيۡ دَرِ، نَه ٿِيُوۡن مُحۡتَاجَ ڪَنۡهِنۡ ٻِيۡ جَا!!
ڪِجَانۡ حَاجَتَ رَوَاڪُلَ جِيۡ، اِنِهيءَ اِيۡقَانَ جيۡ صَدۡقيۡ،
ڪُشَادوۡ رِزۡقُ ڪَرۡ قَادۡرَ، بَچَائِجۡ تَنگِّدَسۡتِيۡءَ کَانۡ!!
ڇَڏَائِجِ دَيۡنَ کَانۡ دَاتَا، تُونۡ پَنۡهِنۡجيۡ دَانَ جيۡ صَدۡقيۡ،
فَتۡحَ ڏيۡ دِيۡندارَنِ کيۡ، فَضُلَ پَنۡهِنۡجيۡ سَانۡ ايۡ فَاتِحَ!!
فَرِيۡقَتَ ڪَڍۡ اَسَانۡ مَانۡ تُونۡ، سَچيۡ فُرۡقَانَ جيۡ صَدۡقيۡ،
عِبَادَتَ خَاصَ تُنهِنۡجيۡ اِسۡتَعَانَتَ، ۽ مَدَدَ تُنۡهِنۡجيۡ!!
سَدَا توۡحِيۡدَ تيۡ قَائِمُ، رَکجِ قُرآن جيۡ صَدۡقيۡ،
سَڏَايُوۡن ٿَا سَدَا سَائِلَ، آهِيُونۡ پيۡرُو مُحَمَّدَؐ جَا!!
سَدَا رُتِبوۡ ڏِجَئِينۡ سَڀَ تيۡ، سَنۡدَءِ سُلۡطَانَ جيۡ صَدۡقيۡ،

 

غَزَلُ نَمبَرُ 18

”شَانِ بَارِيۡ تَعَاليٰ“

پَنۡهِنۡجِيۡ عَظۡمَتَ کيۡ عَيَانۡ، اِنِّيۡ اَنَا اللهَ ۾ ڪِيئِينۡ!!
شان وَحَدَتَ جوۡ بَيَانۡ، سَڀِ قُلۡ هُوَاللهَ ۾ ڪِيئِينۡ،
نَا اُمِيۡدَنِ عَاصِيَنِ کيۡ، ڀَرۡوَسوۡ ۽ آسِروۡ!!
فَضۡلَ سَانَ لَاتَقۡنَطُوا، مِنۡ رَّحۡمَةَ اللهَ ۾ ڪِيئِينۡ،
حَمۡدُ، طَاعَتۡ، عَبۡدِيۡتَ ۽ اِسۡتَعَانَتَ جَا سَبَقَ!!
اِبۡتَدَا قُرۡآنَ جِيۡ، اَلۡحَمۡدُلِلهِ ۾ ڪِيئِينۡ،
مِلۡڪِيَتَ سَارِيءَ جوۡ مَالِڪُ، مَالُ هَٿَ ۾ ڏَئِيۡ ڪَريۡ!!
موۡمِنَنِ جِيۡ آزِمَائِشَ، اَقۡرِضُو اللهَ ۾ ڪِيئِينۡ،
پَنۡهِنۡجيۡ ٻَانَهَنِ لَاءِ رَهَبَرُ، ۽ هِدَايَتَ موۡڪَلِيۡ!!
سَڀِنِ تيۡ دَهَشتَ ۽ دَڙۡڪوۡ، اِتَّقُواللهَ ۾ ڪَيئِينۡ،
گُنَهَگَارَنِ لَاءِ وَعۡدوۡ، آسِروۡ بَخۡشَشۡ جيۡ لَاءِ!!
فَضۡلَ ۽ اَحۡسَانَ سَانۡ تُوبُو اِلَيٰ اللهَ ۾ ڪَيئِينۡ،
اَثَرُ، دَهَشَتَ، دَٻۡدَٻوۡ، قُرآن جيۡ اَحۡڪَامَ جوۡ!!
خَاشِعاً مُتَصَدِّعاً، مِنۡ خَشِيَةِ اللهِ ۾ ڪَيئِينۡ،
حُڪُمُ ڪوۡشَشِ جوۡ ڪَيَاءٍ، جَاهَدُوا فِيۡ اللهِ ۾!!
پَرَ تسّلَيٰ قَلۡبَ جِيۡ، نَصۡرءٌ مِنَ اللهِ ۾ ڪَيئِينۡ،
دِيۡنَ جَا اَحڪَامَ اِسۡتَحڪَامَ، ۽ اِنَعَامَ سَڀِ!!
مَرۡتَبَا ۽ شَانُ اَعۡليٰ، ڪَلۡمَةُ اللهِ ۾ ڪَيئِينۡ،
غَيۡرَ جيۡ دَهَشَت ۽ دَڙۡڪَنِ، کَانۡ نَه ڊِڄُ سَائِلَ ڪَڏَهٍ!!
رَحَمَ سَانۡ هِيۡ رَازۡ مَخۡفِيۡ، حَسۡبُنَا اللهَ ۾ ڪَيئِينۡ،

 

غَزَلُ نمبر 19

”شانِ بَارِيۡ تَعَاليٰ“

رَبُّ اَسَانۡجوۡ خَالِقُ بَارِيۡ، جَنۡهِن هِيۡ خَلۡقِيۡ خَلۡقَتَ سَارِيۡ،
عَرۡشَ زَمِيۡنُونۡ اَڀَ اُپَائيۡ!! سَجُ چَنۡڊُ تَارَا ڪِيئِين سَيَارِيۡ،
مَاڻُهوۡنۡ، جِنَّ، مَلَڪَ، سَڀِ حَيۡوَانۡ!! ڪيۡ ٿِئَا نُورِيۡ ڪيۡ ٿِئَا نَارِيۡ،
عَرۡبِيۡ، عَجَمِيۡ، هنّدِيۡ، سِنّڌِيۡ!! تُرۡڪِيۡ، اَفۡغَانِيۡ، تَاتَارِيۡ،
سَڀَڪَا خَلۡقَتَ خَلۡقِيۡ موۡلَا!! ڳَاڙِهِيۡ، زَرۡدِيۡ، سَائِيۡ، ڪَارِيۡ،
وَڻَ ٽِڻَ، ٻُوٽَا، گُل گُلۡڪَارِيُون!! جَنجيۡ سُونهيۡ ٽارِيۡ ٽَارِيۡ،
مِهۡرَ وَڏِيۡ سَانۡ مِينۡهَنۡ وَسَائيۡ!! جَنۡهِنۡ مَانۡ آهِنِ دَرۡيَا جَارِيۡ،
پوۡکُونۡ جَنۡهِن تيۡ هَارِيۡ پوکِنِ!! پَئيۡ ٿيۡ جَهرِ جَهنگَ ۾ جَنۡسَارِيۡ،
سُرَهَا گُل ڦُل عُمۡدَا ميۡوَا!! جَنۡجِيۡ بُوءِ بَهَارِيۡءَ وَارِيۡ،
مِيۡنَهنۡ وَسَائيۡ وَاهَ وَهَائيۡ!! هُرۡلَا هَرَ هَلَائِنِ هَارِيۡ،

 

سَائِلَ تُنۡهِنۡجوۡ سَائِيۡن سوۡ ٿِئوۡ!!
جَنهِنۡکيۡ پَنهِنۡجِيۡ خَلۡقَتَ پِيَارِيۡ،

 

غَزَلُ نَمبرُ 20

”عِنَايَاتِ بَارِيۡ تَعَالَيٰ“

جَنۡهِنۡ ڌَڻِيۡءَ ڏَاتَارَ لَکَه لَکَه، ڏَاجَ اَڻَ گُهرۡئيۡ ڏِنَا!!
اُوۡ سَچوۡ سَائِينۡ ڇَڏيۡ مَانۡ، ڪِيئَنۡ وَڃِيۡ پَرَ کَانۡ پِنَا،
جوۡ سَچوۡ خَلَّاقُ اَڪۡبَر سَڀَنِ، جوۡ پَرَوَرۡدِگَارُ!!
ٻِيوۡ نَه ڪوۡ لَائِقُ عِبَادَتَ، جوۡ ٿِيوۡ اُنَ کَانۡ بِنَا،
خَلۡقِيئِينۡ اِنۡسَانَ کيۡ اَحۡسَانَ، سَانۡ اَحَسَنُ ڪَريۡ!!
موۡڪَليۡ مُرۡسَلَؐ ڪَيَائِينۡ، دِيۡن مَحَڪُمَ جِيۡ بِنَا،
مُرۡسَلَن ۾ مُصۡطَفَيٰؐ، ڪِيَائِينۡ اَسَانۡجوۡ مُقۡتَدَا!!
جَنۡهِنۡ اَسَانۡکيۡ وَاٽۡ ڏيۡکَارِيۡ، سِڌِيۡ رَاهِ جَنَا،
دِينِ قَيُّمُ مِلّتِ بيۡضَا، خَلِيۡلُ اللهِ جِيۡ!!
جَنۡهِنۡ هَٿَن سَانۡ پَنۡهِنۡجِيۡ، پُٽَ جيۡ گَڏُ ڪِئو ڪَعَبوۡ بِنَا،
رَحَمَ رِيءَ رَحۡمٰنَ جيۡ، ٻِيۡ رَاهَ نَاهيۡ ڪَا ڪِٿيۡ!!
اُنَجَا بَندا آهِيُونۡ مِڙَئيِ، جِي آهِيُون ڪوجَها ڪِنا،
رَحَم پَنهنجي سَان مُڪو جَنهِن، رَحۡمَةُ الِّلِعَالَمِيۡنۡ!!
اُنَجيۡ رَحۡمَتَ سَاڻُ رَحۡمَتَ، ۾ رَهَائِجِ رَبَّنَا،

 

غَزَلُ نَمبَرُ 21

”اِلۡتِجَا بَدَرۡ گَاهِ خُدَاوَنّدِيۡ“

رَحَمُ ڪَرِ ايۡ رَحَمَ وَارَا، ڀيۡجِ رَحۡمَتَ جَا ڪَڻَان!!
اَڄُ اُٿِيۡ اَڌَ رَاتۡ جوۡ هِيۡ، سَيۡنَ توۡ وَٽِ ٿوۡ هڻَان،
بيۡ عَدَدُ وَارِيۡءَ جيۡ دَاڻنِ، کَانۡ بِه وَڌِ مُنۡهِنۡجَا گُناهَ!!
سَارِيَانۡ سَارِيۡ عُمِر گهَٽِ، ڪِيۡنَ ٿِيۡندَا ڪيۡ گَهڻان،
حَيۡفُ مُنۡهِنۡجيۡ حَالَ تيۡ، سَارِيۡ عُمۡرِ بَرۡبَادُ ٿِيۡ!!
روۡزُ شَبۡ پِئوۡ موۡتَ جوۡ سَڏُ، ڪَئينۡ دَفۡعَا ڪَنَ سَانۡ سُڻَان،
توۡ چَيوۡ وَٺُ وَاٽَ هِيءَ، هٰذَا صِرَاط مُسۡتَقِيۡمَ!!
پَرَ ڇَڏۡئوۡ سَا وَاٽَ تُنۡهِنۡجِيۡ، رَاهَ نَفۡسَانِيۡ ڌُڻَانۡ،
تُنۡهِنۡجَا حَقَ هِڪۡڙيۡ طَرَفِ، ۽ ٻيۡ طَرَفِ حَقُّ الۡعِبَادَ!!
لَکَه هَزَاريۡنۡ بَارَ سِرَ تيۡ، ڪِيئَن مَٿوۡ پَنۡهِنۡجوۡ کَڻَانۡ،
وَقۡتُ مُوۡن پَنۡهِنۡجوۡ وِڃَايوۡ، ويۡسَلوۡ ويۡهِيۡ سَڄوۡ!!
پوۡکَه پوۡکِيَم ڪَانَڪَا هَاڻيۡ، لُڻَانۡ ڇَا ڇَا لُڻَانۡ،
ٻَارِ ۾ ٻَاجھَرۡ نَه آهيۡ، ڪَڻۡڪَ نَاهيۡ ڪَا ڪَپَاهَ!!
چُسۡتُ ٿِيۡ چَرۡخوۡ نَه چوۡرِيُم، ڪِيئَن ڪَتَانۡ ۽ ڪِيئَن اُڻَانۡ،

 

غَزَلُ نَمبَرُ 22

”شُڪۡرِ بَارِيۡ تَعَاليٰ“

سَويۡن اَحۡسَانَ سَائِيۡن جَا، ڪِروۡڙِينۡ ڀَالَ ٿوۡ ڀَايَانۡ!!
پُڄَانۡ هِڪۡڙِيۡ نَه ٿوۡرِيۡ کِيۡ، ڳَڻِيۡ ڳُڻَ ڪيۡتَرا ڳَايَانۡ،
ڍَڪَائيۡ ويۡسُ اِنۡسَانِيۡ، عَطَا ڪِئَيائِينۡ مُسۡلِمَانِيۡ!!
اِهوۡ بَسۡ! لُطۡفُ رَبَّانِيۡ، جوۡ ٻَانۡهُونۡ ٿوۡ سَنۡدُسِ چَايَانۡ،
بَنِيۡ آدَمَؑ ۾ هوۡ بِهۡتَرۡ، مُحَمَّدُؐ مُصۡطَفَيٰ مِهۡتَرۡ!!
سَڄيۡ عَالَمَ جوۡ پَيۡغَمَّبَرۡؐ، اُنِهِيءَ جوۡ اُمَّتِيۡ آهِيَانۡ،
ڏِنَاءِ ڏَاجَ ۾ قُرۡآنۡ، ڪِتَابُ اللهِ عَالِيۡ شَانۡ!!
اِهوۡ اَحۡسَانَ تيۡ اَحۡسانۡ، اَعۡليٰ شَانۡ ٿِئوۡ شَايَانۡ،
اِهوۡ بَسۡ! ڪَرَمُ ٿِئوۡ ڪَافِيۡ، مُحَمَّدُ ؐ مُصۡطَفيٰ ؐ شَافِيۡ!!
گهُرِيوۡ اُنِهِيءَ جِيۡ حَقۡ مَعَافِيۡ، بَدۡيُوۡن بَدۡحَالَ بَخۡشَايَانۡ،
مِلِيۡ خِلۡوَتَ ڪِڻِمِ خَالِيۡ، نَڪَا مُلۡڪِيَتِ نَڪَا مَالِيۡ!!
فُقَطِ ڏَاتَارُ ۽ سُوَالِيۡ، گهُرَانۡ جيۡڪِيۡ پَلَئِه پَايَانۡ،
لَکيۡن پيۡنَارَ جوۡ پَاريۡ، پِنَڻُ ڀِيۡ پَاڻَ سيۡکَاريۡ!!
گهُرَڻَ کَانۡ اَڳُه گهَڻُونۡ ڏِيَاريۡ، اُنِهيءَ جيۡ دَرَ تيۡ ٻَاڏَايَانۡ،
ڏِسَڻَ ۾ ظَاهِرِيۡ زِنّدَانۡ، ٿِئوۡ مُونۡ لَاءِ فَرَحَتَ جَانۡ!!
مِڙَئِيۡ تَڪۡلِيۡفَ ٿِيۡ آسَانۡ، پَڙهَانۡ پِئوۡ پَاڻَ پَڙۡهَايَانۡ،
ڏِسۡئوۡ اَهڙِيءَ شَفۡقَتَ کيۡ، عِنَايَتَ لُطۡفَ رَحۡمَتَ کيۡ!!
سَعَادَتۡ فَيۡضَ حِڪۡمَتَ کيۡ، سَدَا سَائِلُ سَنۡدُسِ چَايَانۡ،

نئون صفحو --  ڪتاب جو ٽائيٽل صفحو
ٻيا صفحا 1 2 3 4 5 6 7 8 9 10 11 12 13
هوم پيج - - لائبريري ڪئٽلاگ