|
سلوڪ ساڌ مهما
(ب)
(1)
جاچي سڀُ جَهانُ، ڏِٺُمِ ٻُڌِ وِويڪَ سان،
سامي آهي ڪونَه ڪو، ساڌو جَنَ سَمانُ،
جَنهن سَهَجـٖـي مَنُ سيتَلُ ڪيو، ڏيئي آتَمُ
گِيانُ،
سَدائي قُربانُ، وَڃان تَنهن جي نانوَ تون.
(2)
پنڊِتَ پُڪرٖي، سارُ لَکائِنِ سَڀَ کي،
سامي سمُجِهي ڪو سورِمو، هِرِدي مَنجهه ڌَري،
لاهي ڇَڏي سِرَ تون، پَرِڇِنَ پِنڊَ پري،
سامي ڏسِي ٺَري، پَرِتکِ پورَنُ آتَما.
(3)
هَرِجَنَ ڪڍِي هَٽُ، ويٺا سؤدي سارَ جو،
سَمَ رکيائون ساهِمي، سَمَ رکِيائون وَٽُ،
وَٺي ڪو ويساهَه سان، نيهِي نِهَه ڪَپَٽُ،
پَرَميسَرُ پَرگَهٽُ، سُتَهَه ڏِسـٖـي، سامي چَئي.
(4)
هَرِجَنَ ڪَڍِي هَٽُ، ويٺا قَلَعي گَرَ جو،
مَنَ کي ڏيئي مُسِڪلِو، لاهِن ڪَلِپَتِ ڪَٽُ،
سامي ڏيکارِنِ ڏيِلَ ۾، پَرِميسَرُ پَرِگهٽُ،
تَنِ جي مِحِنَتَ مَٽُ، اَچي ڪينَ عَقُلَ ۾.
(5)
هرِجَنَ هَٽُ پَٽي، ويٺا سَودي سارَ جو،
وَٺي ڪو ويساهَ سان، سامي سرُ سَٽي،
پاڻُ وَرائي پاڻَ کي، ڏِسِي کيپَ کَٽي،
ڪَلِپَتِ سَڀَ ڪَٽي، اِسِٿِتِ ٿِئي آڪاسَ جان.
(6)
ڪيوَلَ ڪلولِي، ساڌو جَنَ سَنسارَ ۾،
جَنِ کي ڏِني سَتِگُروءَ، اَنَڀَئِه اَمولي،
سَٽي وڌائون سِرَ تون، پَرِڇِنَ پِنڊَ پولي،
هميشَه هولي، سامي ڪَنِ سَروپَ سان.
(7)
آئي کي آدَرُ، شَرِڌا سان ساڌو ڪَري،
مِٽيو جَنهن جي مَنَ مون، مَمَتا موهُ مَڪَرُ،
ڏِسـٖـي عينَ اَڪاسَ جان، پورَنُ پَرِ ميسَرُ،
سَدا اَجَرُ آمَرُ، سامي رَهي سُڀاوَ ۾.
(8)
ساڌو جَنَ سانجهو، ڪَنِ اُپَديشُ اَنَڀئِي،
سَمُجهـٖـي ڪو سامي چَئي، مَحَبَتي مانجهو،
ڪَٽيو جَنهن ڪِرپا سان، لوڪائِي لانجهو،
رومَ رومَ رانجهو، هَرِدَمُ ڏِسي هِيرَ جان.
(9)
جئين ڪَنوَلَ کُلِي، ڪَنِ خَشِبونءِ خوشيءَ جي،
تِئين ساڌو ڏِيَن سَڀَ کي، اَنَڀئِه اَڻَ مُلهي،
وَٺن وِڌِ ويساهَ سان، ڪي عاشِقَ اَصُلي،
ميٽي ڪِلپَ ڪُلي، سامي اَچَنِ سَنتوکَ ۾.
(10)
جيڪو دُکي جيءُ، سَرَنِ پَئي ساڌوءَ جـٖـي،
ميٽي تنهن جي مَنَ مون، سَهَجـٖـي سَنِسو سيءُ،
سامي لَکائـٖـي لَکَ سان، پَرِتکِ پورَنُ پيءُ،
چَوي جيءُ نَه ٿيءُ، پُٺي ڏيئي پاڻَ کي.
(11)
ساڌوءَ سَرَنِ پِيو، جيڪو هاري هِتَ سانَ،
سَهَجي تَنهِن جو سَتِگُروءَ، ڪارِجُ سِڌِ ڪِيو،
ڏيئي ڪَنڊِ ڪَلپَتِ کي، سامي سُکي ٿِيو،
بِنان ٻوڌ ٻِيو، ڏِسي ڪينَ آکِنِ سان.
(12)
ساڌوءَ جـٖـي سَرَني، لَکين لوڪَ تَري ويا،
سُکي ٿيا سامي چئي، وَچَنُ صافُ مَني،
پَرِتک ڏِسَنِ پانهنجا، ٻيڙا لڳا ٻَني،
ڪَبيرَ، رَوِداسَ، ڌَني، ساکَ ڏِني سَڀِني سَچي.
(13)
هَرِجَنُ حَضوري، اَچي مِليو اوچتي،
تَنهِن ڳالهِه ٻُڌائي ڳُجَهه جي، سَڀَ وَٽـٖـي
پُوري،
سَمُجِهي آئي جيءَ کي، سامي صَبوري،
نَظَرَ ٿي نوري، حاجَتَ رَهِي نفه حَجَ جي.
(14)
ساڌو جَنُ سکي، مِلِيو ديسَ ملارَ جو،
تَنهِن جاڳايو زورَ سان، ٽيڍي رَمِزَ رکي،
سامي سِپَ سيتَلُ ٿي، بيحَدِ بوندَ چکي،
اَچـٖـي اَنَلُ پکي، اُلٽِي چَڙِهيو اَڪاسَ تي،
(15)
ساڌو جَنَ سُگَمُ، مارِگُ موکَ جو،
سامي رِکيو ڪَنهن سورَمي، ڪَلِپَتِ پارِ قَدَمُ،
ماري ڪيو جنهن مَنَ جو، ڀولائو سَڀُ ڀَسَمُ،
گَهَر ۾ گَهرُ گُهورَمُ، پائي ويٺو پاڪُ ٿي.
(16)
ساڌو جَنُ سَچارُ، اَچي مِليو اوچِتي،
ڪَيو تنهن ڪِرِپا سان، گِياتِ ڏيئي گُلزارُ،
رَهِيو نَه رَتيءَ جيترو، اَوِدِيا جو اَهَنڪارُ،
سامي چَئي سَنسارُ، لَئِه ڏِٺو سَڀُ لَکَ ۾.
(17)
ساڌو جَنُ سَچارُ، ڪاڻِ نَه ڪڍي ڪَنهِن جي،
جَنهن کي ڏِني سَتِگُروءَ، اَنَڀئِه مَتِ اَپارَ،
سُتَهَه رَهي سامي چئي، بَڻيءَ تي هِسَوارُ،
ٻولِي اَمِبرِتُ سارُ، سِيتَلُ ڪَري سَڀَ کي.
(18)
ساڌو جَنُ سَچارُ، ڪَري ڪانَه ڪَلپَنا،
جنهن کي اَزِغَئِبي چَڙِهيو، پورَنُ پِريمَ خمارُ،
پَرِتکِ ڏِسـٖـي پيءَ جو، دَهَ دِسا ديدارُ،
بَڻيءَ تي هَسوارُ، سَدا رَهي سامي چَئي.
(19)
ساڌو جَنُ سَچارُ، پاسي ٿئي نَه پيءَ کون،
سَمُجِهيو جنهن سامي چَئي، سُپَني جو سَنسارُ،
رکي نَه رَتيءَ جيترو، اَندَرَ ۾ اَهَنڪارُ،
جئين بيحَدِ ٻارُ، وَرِتي وِڌِ نِکيدَ ري.
(20)
ساڌو جَنُ سُچکُ، ڪوڙِنِ ۾ ڪو هِڪڙو،
مِٽيو جنهن جي مَنَ مون، سامي پَرڇَنُ پکُ
خالي ڏِسي ڪونَه ڪو، ڪَرِتا ٻاجهون ڪکُ،
ٿِي پورَنُ پارکُ، وَرِتـٖـي وِڌِ ويچارَ سان.
(21)
ساڌو جَنُ سَچو، ڪَري اُپَديشُ اَنَڀئِي،
سامي چَئي سَڀَ کي، اُلٽي گَهرِ اَچو،
ڪَڏي ٿِئي ڪِينَڪِي، ڪَلِپَتِ مَنجِهه ڪَچو،
رَهي رَنگ رَچو، سُتَهَه سُڌِ سَروپَ جي.
(22)
ساڌو جَنُ سُجانُ، مِليو پورَنَ پُنڃَ تي،
تنهين لکايو رَمِزَ سان، چِٽو چيتَنَ ڀانُ،
خالي جَنهِن کان نانهِه ڪو، ڪَرِن وِيدَ وکان،
اَندَرَ مون اَڀِمانُ، ڇڏي ڏسي ڪو سورَمو.
(23)
ساڌو جَنُ سُجان، ڪَري ڪانَه ڪَلِپَنا،
ڏِٺو جنهُن اَکِنِ سان، چَڙهيون چيتَنَ ڀانُ،
آهي جنهن جي آسري، سامي سَماڌِ اُٿانُ،
مِٽـٖـي سَڀُ اُنِمانُ، ماڻي مَوجَ مُڪِتِ جِي.
(24)
ساڌو جَنُ سِپاهِي، ماري مَنَ مَواسَ کي،
جوڌ اپَنجئي زورَ سان، ڪَري ڍَڍٖي جا گهائِي،
سامي چَلائي سَرِبَ گَتِ، عَدُلُ اِلاهي،
دَهَ دِسِ دُهائِي، ڦيري ڦُرِني فَوجَ بِنِ.
(25)
ساڌو جَنُ سُورو، سَدا رَسـٖـي سَنگِرامَ ۾،
مارِي کائِــٖـي مَنَ کي، اَنَڀئِه اَجورو،
سامي ڏِسـٖـي سَڀَ ۾، پَرَميسَرُ پورو،
کٿو، لوئي، ڀُورو، ڄاڻـٖـي اَصُلي اُنَ جو.
(26)
راتِ ڏينهن جو ڦيرُ، ڏِسَڻَ آئون ٻُڌَڻَ ۾،
سَمُجهي ڪو سامي چَئي، ساڌو جَنُ سُميرُ،
پَرِچي لَڌو جَنهن پَدَ جو، پَرِڇِنتا جو پيرُ،
ٿِي نِرَڀِئه نِرَويرُ، ڪَري عَدالتَ اَنَڀَئي.
(27)
تنهن کي چَونِ چَري، چَرِيا جيءَ جَهانَ جا،
جا لَنگهي چَڙهِي لَکَ تي، طَمَعَ تارَ تَري،
پيءُ ڏِٺائين پَڌِرو، پَٽـٖـي دَرِسَ دَري،
سامي اَجَرُ جَري، مُشڪـٖـي ڪُشڪِي ڪِينَڪِي،
(28)
سَدا پاڪُ پُرِکُ، وَرتي ويدَ ويچارَ سان،
ديا ڌاري دِلِ ۾، سَڀ جو ميٽي دُکُ،
پِيئي پِئاري پِريمَ رَسُ، ماڻي سَمَتا سُکُ،
سَدائي سَنَمُکُ، سامي رَهي سَروپَ جـٖـي.
(29)
دوستَ جو دُئارو، سُڃَ وَسَنوَ جي وِچَ ۾،
سامي پَهُچي ڪو ساڌُ جَنُ، ڀاڳوانُ ڀارو،
مِٽِيو جَنهن جي مَنَ مون، اَوِدِيا اَنڌارو،
لَکـٖـي لَکَ وارو، ماڻي مَوجَ مُڪِتِ جِي.
(30)
کُليو بيحَدَ باغُ، اَنَڀئِه جي آڪاسَ ۾،
سامي گُلَ سَڀَ رنگَ جا، ڀڳَتِ، جوڳُ وئراڳُ،
سَئِلَ ڪَري ساکي ٿِي، ڪو ساڌو جَنُ سُجاڳُ،
ڦُرني بنا ڦاڳُ، پَل پَل کيلي پاڻَ سان.
سلوڪ ستسنگ مهما
(الف)
(1)
آهِنِ آگمَ اَپارُ، راهان رامَ مِلَڻَ جون،
تَنِ سَڀِني ۾ هِڪڙي، ساڌَ سَنگَتِ نِرِوارُ،
سامي مِلُ تَنهين سان، ڪَري پِريمَ پيارُ،
تَه دوسِتَ جو ديدارُ، ڏِسين ڀيدَ ڀَرَمَ ري.
(2)
اَٿِي سَڀُ ڪَلِياڻُ، ڀَرَمُ ڀُلائو دور ڪَرِ،
مِلي مَهَدَ جَنَنِ سان، چِنِ ماتِرَ پَدُ ڄاڻ،
پَسي پانهنجو پاڻُ، تون سامي رَهُ سُڀاوَ ۾.
(3)
اَٿي سَڀُ ڪَلِياڻُ، ڀَرَمُ ڀُلائو دورِ ڪَرِ،
مِلي ساڌَ سَنگَتِ سان، سامي پاڻُ سُڃاڻُ،
اِها اَوِدِيا ڄاڻُ، پائڻُ پرَميسَرَ جو.
(4)
دَرِ دَرِ ڪِيمَ ٻُنڌاءِ، سامي سِڪَ پِريَنِ جي،
مِلي ساڌَ سَنگَتِ سان، وائي سَڀ وِڃاءِ،
پائي گِياتَ گُروءَ جي، اَنتَرِ مُکِ مَنُ لاءِ،
تَه لُنوَ لُنوَ لکاءِ، مورَتَ محبوبَنِ جي.
(5)
دَرِ دَرِ ڪِيم ٻُڌاءِ، حَقُ حقيقت ڳالِهڙي،
مِلي مَهَدَ جَنَنِ سان، جهاتي جَهروکي پاءِ،
اَوِديا ڪُلفُ اَندرَ جو لِنوَ ڪُنجيءَ سان لاهه،
ته لُنؤَ لُنؤَ منجهه لَکاءِ، مُورت محبوبن جِي.
(6)
اُها پوٿي پَڙهُه، جنهن سان لَهين آلکَ کي،
مِلي ساڌَ سنگتِ سان، چيَنَ چَونڪيءَ چَڙُهه،
اَوِدِيا مَنجِهه نَه اَڙُ، سَمُجَهه ري سامي چئي.
(7)
عَجائبُ آهي سَنگَتِ ساڌو جَنَ جي،
اَوِدِيا مَيلُ اندَرَ مون، ڌوئي سَڀُ لاهي،
سامي لَکائي، پانهنجو پاڻُ اَکِنِ سان.
(8)
ڪُوڙا گَهڙِ مَ گهاٽَ، مورِکَ جي ڀاءِ تون،
مِلي ساڌَ سَنگَتِ سان، وَٺُ ويساهون واٽَ،
تَه کولي بَجَرَ ڪَپاٽَ، ڪامِلَ ڏِيَني ڪَلَ سان.
(9)
سامي ڄاڻِجَ ڇَلُ، ڪايا مايا ڪُلَ کي،
جئين سُکُ سُپَني جو، مِرِگَهه تِرِشنا جو جَلُ،
جاڳي ڪَڍي جيءَ مون، گُرگَمَ خامُ خَلَلُ،
ڪَري جَنَمُ سَڦَلُ، مِلِي ساڌَ سنگَتِ سان.
(10)
ڪرين پُرِکارَٿُ، مِلي مَهَدَ جَنَنِ سان،
مَمَتِ وِڃائي مَنَ جي سامي ٿِئين سَمَرَٿُ،
تَه آتَمُ پَدُ اَڪَٿُ، لوڙي لَهين گَهرَ مون.
(11)
سَڀَ کون پَدُ اُچو، ساڌ سَنگَت هَرِڀڳَتِ جو،
ڪوڙِنِ ۾ ڪو هڪڙو، سَمُجهي ساڌُ سَچو،
لايو تنهن مُرِچو، سامي سُپيريَنِ سان.
(12)
ڪيتري ڳَڻِيان، مَهِما ساڌَ سَنگَت جي،
سِڌَ ساڌِڪَ جوڳي جَتِي گاوَنِ سَهَسَ ڦَڻِيان،
جَنِڪَ سَنِڪَ سُڪَديوَ دَتَ، سامي داسَ بَڻيان،
جَنِ کي واڪَ وَڻيان، سي سَڀيئي سُڌِرِيا.
(13)
لَکين لوڪَ تَرِيا مِلي ساڌَ سَنگَتِ سان،
وَڃي پُڇُ تَنين کون، جَنين هِرِدي واڪَ ڌَرِيا،
سَدا رَهَنِ ٺَرِيا، سامي سيتَلَ جَلَ جان.
(14)
وَڏي وَڏائي، ساڌَ سَنگَت گُرَ گِياتِ جي،
ڪوڙِنِ مَنجهون ڪو هِڪِڙو، سَمُجهي گُرَڀائي،
جَنهن مِلي مَهَدَ جَنَنِ سان، ڪَلِ ڪَلِ مِٽائي،
سامي سَدا، پَرِچو رَهي پاڻَ ۾.
(15)
پَرِچي سَڀيئي، ويا لوليءَ جي لاڏ ۾،
ورلي ڪَنهِن گُرَمُکَ کي، سَمَ سُوجِهي پيئي،
جَنهن سَگتِ ساڌوءَ جي ڪَئي، دِلِ ڏيئي،
تنهن جي سَڀَ ويئي، اَوِدِيا ڪَلِپَتَ نِڪري.
(16)
کَنيو جَنهِن قَدَمُ، ساڌَ سَنگَتِ ڏي سَڪَ سان،
مِٽِيو تنهن جي مَنَ مون، سامي چَئي سَڀُ غَمُ،
مَحَبَتي مَحَرَمُ، سُرِجهِي ٿِيو سَروپ جو.
(17)
جَنهِين دِلِ ڏيئي، سامي ساڌَ سَنگَتِ ڪِي،
تَنهن کي پَد آگَمَ جي، سَهجي سُڌِ پيئي،
پورا ڪَيائين پِريمَ سان، ساڌَنَ سڀيئي،
وِڌِ نِکيدِ ٻيئي، ميٽي ويٺو مَنَ مون.
(18)
جَنين نِرِمَلَ مَتِ، وَدِي وَدِي ساڌَ سَنگتِ
کون،
اَنَنَ آتَمَ رامَ جِي، ڪَئي تَنِ ڀڳَتِ،
سامي ٻُڌَنِ ڪينَ ڪي، جڳَ نِندا اُستَتِ،
جڳَتُ سَڀُ اَسَتِ، ڏِٺائون جڳَديسَ ري.
(19)
تَنهِن جِي کيپَ کَٽي، سامي هِنَ سَنسارَ ۾،
جو مِلي ساڌَ سَنگَتِ سان، سَڀُ سُڀاوَ مَٽي،
ڏِسي نيڻَ پَٽي، سَنَمُکِ شاهَ صَرافَ کي.
(20)
ڀُلي ٿِئڙا ڏيِنهَن، آدي گَهرَ اَپارَ کون،
پَوي سُڌِ سَروپَ جي، ڪِرِپا بِنان ڪِيئن؟
ڌَرِتي هَرِي نَه ٿِئي، بِنان پاڻيءَ مِينهَن،
ساڌَ سَنگَتِ جي نِينهَن، سامي ڪارج سِڌِ ڪَيا.
(21)
ٿِئڙو جَنَمُ سَڦَلُ، مِلي ساڌَ سَنگَتِ سان،
جاڳِيو سَهَجَ جَتَنَ ري، پُرِکارَٿُ پَرِٻَلُ،
مِٽي ويئي مَنَ مون، سامي مَمِتا مَلُ،
آتَمُ پَدُ اَچَلُ، پَرچي لَڌو پاڻ مون.
(22)
اَچي جاڳِيو ڀاڳُ، ڪَنهِين پورَنَ پُنَ تي،
مِلي ساڌَ سَنگَتِ سان، سامي ٿِيو سُجاڳُ،
لُنئن لُنئن مَنجِهه ڇُڙي پِيو، سَهَجي نِرمَلُ
ڦاڳُ،
پائي پَدُ اَنُراڳُ، ماهِلُ ٿِيو مَهراڻَ ۾.
(23)
پورَنَ پُرکَ اُتِي، مَٿي ڳالِهه مَرَمَ جِي،
سامي ساڌَ سَنگَتِ جِي، کَنئي جَنهِن جُتِي،
تنهن جِي مَتِ ويساهَ سان، ٿِي اُتَمُ اَڇُتي،
وَڃِي دِرِشِٽِ کُتي، اَنَڀَئِه آگَمَ ۾.
(24)
ٻوهٿ ساڌوءَ سنگُ، پورو سَتِ گُرُ پاتڻي،
سامي مِلـٖـي تَنهن کي، جَنهِن تي آگو رکي اَنگ،
سو ڀَوَ ساگَرَ جي ڀيڙَ کون، پِئڙو پارِ نِسَنگُ،
اَنَڀَئِه آتَمَ رَنگُ، لڳو ڪوڙِنِ مَنجهون ڪَنِ
کي.
(25)
ڀاڳَنِ ڏِنو ڀَرُ، تَڏي جاڳِي سَمُجَهه اَندَرَ ۾،
ڪَيو ساڌَ سَنگَتِ جو، اَدَبَ سان آدَرُ،
تَنهن پِياريٖ رامَ رَسُ، کوليو دَسون دَرُ،
ميٽي ڏُکُ ڏَمَرُ، سامي مِليو سَروپَ سان.
(26)
ڪَهڙي ڀيٽَ ڌَريان، سامي ساڌَ سَنگَتِ کي،
هيرا ماڻِڪَ مَوتي، ڪَنچَنَ ٿالَ ڀَريان،
پَٽَ پَٽيِهَرَ، پاٻِرِيون، توشا ڍِيرَ ڌَرِيان،
توڻي صَدِقي سِرُ ڪُريان، تان ڀي پُڄي نَه پِريمَ
رَتيءَ سان.
(27)
اوراڻا آهِنِ، ڳالِهيون ساپُرِسَنِ جون،
مَمِتا مَيلُ اَندَرَ جِي، ڌوئِي سَڀُ لاهِنِ،
نِرَمَلُ ڪَري مَنَ کي، پَدَ ۾ پَهُچائِنِ،
سَڀَ گَهٽِ لَکائِنِ، سامي سُپيريَنِ کي.
(28)
ڳالهِنِ مَنجِهه آهِن، مِٺِيون ڳالِهِيون ڳوٺَ
جون،
ڏيئي ڏسَ سَڄَڻَ جا، ٿِيون سَڄَڻُ مِلائِنِ،
ڪورِيون سي لاهِنِ، سام ڪَسُ اَندَرَ جي.
(29)
توڙي نِتُ چئي، ڇهَه چارِ اَٺارَهَن مُکَ سان،
تَپَ تِيرَٿَ ساڌَنَ ڪَري، غُفا مَنجِهه رَهي،
بِنان ساڌَ سَنگَتِ جي، وَهَڻَ مَنجِهه وَهي،
سامي ڪيئن لَهي، پُٺي پاڻَ کي.
(30)
تَنهن جا سَڀِ پَرِواڻُ، گيانَ جَپَ جوڳَ جڳ،
جَنهن مِلي ساڌَ سَنگتِ سان، ڏِٺو پَنهنجو پاڻُ،
دُکَ سُکَ لاڀ اَلاڀَ ۾، رَهـٖـي ثابوتيءَ ساڻ،
ڄاڻي سَڀُ ڪَلِياڻُ، سَدائي سامي چَئي.
(31)
ٻِيا سَڀِ ڪَمَ ڪوڙا، ساڌَ سَنگتِ هَرڀڳَتِ ري،
سامي سَمُجَهنِ ڪِينَڪِي، مورِکَ مَتِ موڙِها،
ڪي گُرَمُکَ ڳُوڙها، پَرِچا پاڻُ ڪَڍي ڪَري.
(32)
ٻي سَڀ اَٿي سُڃَ، بِنان ساڌَ سَنگَتِ جي،
مرِگَهه تِرِشنا جي جَلَ مون، سامي لهي نَه اُڃَ،
جاڳَنِ پورَنَ پُڃَ، ته ساڌو سُکَ ساگَرُ ملي.
(33)
بِنان ساڌَ سَنگَتِ، سامي سُڌِرِيو ڪونَه ڪو،
جاڳي ڪَڍُ اَندَرَ مون، ٻي سَڀ مَمِتا مَتِ،
پائي گِياتِ گُروءَ جِي، ڪَرِ اَڀيدَ ڀڳَتِ،
تَه ساکي ڏِسين سَتِ، چيٽيءَ ۽ ڪُنچَرَ ۾.
(34)
ڪوهُ ڪَرين اَڀياسُ، ٿو مورِکَ مايا موهَ جو؟
سامي سَڀيئي ڪَيا، جَنهِن رِڻَ ۾ رولي ناسُ،
مِلي ساڌَ سَنگَتِ سان، ڪَرِ ٻاريءَ مَنجِهه
نِواسُ،
تَه چيتَنَ چِدَ آڪاسُ، ڏِسين پانهِنجي گَهرَ ۾.
(35)
مورِکَ ڪوهُ مَرين، ٿو اَوِدِيا جي آهَنڪارَ ۾،
ملي ساڌَ سَنگتِ سان، سَرِبَ تِياڳُ ڪرين،
سامي اَجَرُ جَرين، تَه سَنَمُکُ ڏِسيــٖـن
سُپِرين.
(36)
مورِکَ ڪوهُ پَچين، ٿو اَوِدِيا جي اَهَنڪارَ ۾،
مِلي ساڌَ سَنگِت سان، رَنگَ ۾ ڇونَه رَچين،
اَهِڙو داءُ اَچي، موٽي بَڻندُءِ ڪِينَڪِي؟
(37)
ڇاکي ٿو سورين، سُمِرِڻيون سَمُجَهه ري،
ساڌَنَ سُپيرَينِ ري، اَٿي سَڀِ اوري،
مِلي ساڌَ سَنگَتِ سان، ڪَلِپَتَ ڪَڍُ ڪوري،
تَه جهُولين هِندورين، سامي اَنَڀَئِه سارَ جي.
(38)
وَچي پَؤ ڪِري، سامي ساڌَ سَنگَتِ ۾،
دِيکِيا وَٺِي دِلِ سان، لَنگهي گهاٽُ گِهرِي،
تَه سَهَجي جڳُ سُپَني جو، وَڃيئي وِسِري،
اَچين ڪِينَ ڦِري، جَنَمَ مَرَڻَ جي دُکَ ۾.
(39)
ڇَڏِ وَڏائي واءُ، ڪايا مايا ڪُلَ جو،
سامي ٿِيندُءِ ڪونَڪو، هَرِ بِنان هَمراهُ،
مِلي ساڌَ سَنگِتِ سان، ساجُهرِ ڪَرِ سَماءُ،
اَهِڙو دِلبَرُ داءُ، موٽي ايندُءِ ڪِينَڪي.
(40)
نانا بيکَ مَ ڌارِ، مورِکَ مَنَ جي ڀاءِ تون،
ڪونَه ٻُڌوسي ڪاٿَئِين، ڦِيڻَ لَنگهايو پارِ،
مِلي ساڌَ سَنگَتِ سان، اَوِديا ڀَرَمُ نِوارِ،
جاڳي پاڻُ سَنڀارِ، تَه سُکي ٿِئين سامي چَئي.
(41)
هِيرو جَنَمُ نَه هارِ، مورِکَ مَنَ جي ڀاءِ تون،
مِلي ساڌَ سَنگَتِ سان، اَوِدِيا ڀَرَمُ نِوارِ،
پانهِنجو پاڻُ سَنڀارِ، ته سُکي ٿِئيــٖـن سامي
چئي.
(43)
مُورِکَ ڪِينَ ڏِسَنِ، سَنَمُکُ سُپيريَنِ کي،
اَوِدِيا جيءَ اَنڌا ڪَيا، ڏِنو پَٽُ پِريَنِ،
ڀَرَمَ مَنجِهه ڀُلي ڪَري، ٿا پَنا نِتُ پَڙَهَنِ،
تَپَ تِيرَٿَ بِرِتَ نيمَ، جڳَ جُهِدُ ڪَيو
جاڳَنِ،
غُفا بَنَ پَهاڙَ ۾، بُکَ اُڃَ دُکَ سَهَنِ،
نانا بيــٖـک ڌري ڪَري، ٿا ديهه اَمولَ دَهنِ،
بِنان ساڌَ سَنگَتِ جي، سَڀِ وَهَڻَ مَنجِهه
وَهنِ،
ڪي لَکايا لَهَنِ، سامي سُپيرِيَنِ کي.
(43)
تِرِشِنا تارِ نَدي، سَدا وَهي تِکَ تاوَ سان،
تَنهِن ۾ واگهو ڪَڇَ مَڇ، سَهَسين سَنَٻَنڌي،
سامي وِجهيــٖـن ڪِينَڪِي، تون پانهنجو پاڻُ
ٻَنڌي،
ڪيوَلِ هِڪَ ڪَنڌي، وَٺيــٖـن ساڌَ سَنگتِ جي.
(44)
سَواد سَڀيئي، ڪَري ڏِٺَم رامَ ري،
ڪنَهين کَٽِيو ڪِينَڪِي، کيپَ کُٽِي پيئي،
سامي ساڌَ سَنگتِ سان، مِلِيُسِ مَنُ ڏيئي،
سُتَهِه سُڌِ پيئي، ويئي کوٽِ خُواري نِڪري.
(45)
تَڪي بيٺُس تَڙَ، ڪنهن پارِ لَنگهايو ڪِينَڪِي،
بيکَ گِرِستِي لوڪَ سَڀِ، سامي سُورَ سُگَهڙَ،
ٿَڪِي ساڌَ سَنگَتِ جِي، لِنوَ سان وَدِيمَ لَڙُ،
سَهَجي اَوِدِيا اَڙَ، مِٽي ويئي مَنَ مون.
(46)
رَهِسِ سَڀ ڀِٽِڪي، بيکَ پَنٿَ جوڳي جَتي،
ڪَنهِين لاٿي ڪِينَڪِي، مَمتا مَٽِڪي،
ڪَنهِين پُورَنَ پُنَ تي، اَچي ساڌوءَ اَٽڪي،
سولائي چِتَ چَٽِڪي، سامي کَڻي وِيو سِيرَ ۾.
(47)
ڪَري اُپاوَ ٿَڪِي، مَيلُ نَه مِٽي مَنَ جِي،
سامي ساڌَ سَنگتِ جِي، سَچي اوٽ تَڪي،
تَنِ راهَ لَکِائي لَکَ سان، پيراڍُنِ پَڪي،
ڏِسي دَرَسُ ڇَڪِي، بوندَ سَمائي سِنڌُ ۾.
(48)
ٽيئي لوڪَ رُلي، سانت نَه آئي جيءَ کي،
مِلي ساڌَ سَنگَتِ سان، اَوِدِيا ڳَنڍِ کُلي،
ويئي ڀاسَ ڀُلي، سامي چَئي سَنسارَ جي.
(49)
سدائي سيتَلُ، سَنگَت ساڌو جَنَ جي،
ڪوري سَڀَ قَلوبَ مان، ڪَڍٖي مَمتا مَلُ،
جوڙي جوت سَروپ سان، سامي ڪري من اَچَلُ،
چڙهيو جنِ عمل، واقفُ سي وِرونهَن جا.
(50)
ڪري وَٺُ اُپاءُ، اَوِدِيا روڳَ اَسارَ جو،
موٽي ايندءُ ڪِينَڪي، اَهِڙو اُتَمُ داءُ،
ملي ساڌَ سَنگَتِ سان، اَنَڀَئِه اَوکَدُ کاءُ،
تَه سامي نانا ڀاءُ، مِٽي وَڃيئي مَنَ مون.
(51)
ڪَري سَمَ صِدِقُ، مِليــٖـن ساڌَ سَنگَتِ سان،
جي توکي پياسَ پَسَڻَ جي، تَه سِپَ چاترڪَ جان
سِڪُ،
پائي بوند اَنَڀَئِي ڪرِ لوڪنِ کون لِڪُ،
تَه اَندَرِ ٻاهَرِ هِڪُ، سامي ڏِسيــٖـن سُپرين.
(52)
ڪَهڙيءَ ڀڳَتِ تي، مِلـٖـي پِيارو پانهنجو،
شيوا پوڄا ساڌِنا، پَهُچي ڪينَ تِتي،
جَپَ تَپَ جوڳُ ڪَري رَهيا، ڪَلَ نَه ڪَنهين کي
سامي پَهُتا سي، جَن جو ساهُ سَنگت ۾.
(53)
ڪنهن جي ڪينَ وَڃي، ڪَلِپَتَ ساڌَ سَنگت ري،
اِها ڳالهِه اَنَڀَئِي، ڪو گُرمُکُ هِڪُ مڃي،
جيڪو ڀولُ ڀَڃي، سامي سَنتَنِ سان مِلي.
(54)
ڪَنهن وِرلي وَڄايو، نگارو نِرَٻاڻَ جو،
جَنهِن تي ساڌَ سنگَت جو، سامي ٿيو سايو،
اُلٽي گَهرِ آيو، چاهَ وِڃائـٖـي چِتَ جي.
(55)
سُوڌي سَنگُ ڪَري، سامي سَچارَن جو،
سدا جَن جي منَ ۾، محَبَتَ مَچُ ٻَري،
سُتَهه سِڌِ سَروپَ کون، پَلَڪَ نَه ٿِئن پَري،
ڏِئَنِ ڀَنڊارَ ڀَري، سَڀَڪَنهِن کي سُکَ جا.
(56)
اَچي هِن اَوسَرِ، جيڪو پريتِ پَڪيءَ سان،
وَٺِي وَڃان تنهن جَنَ کي، پَرِچي پَنهنجي گُهرِ،
چاڙهي پريمَ چوڏولَ ۾، ڪَريان سَڀني کون سَرِ،
حاضُرُ ڏِسـٖـي هَرِ، سامي ڀيدَ ڀَرَمَ ري.
(57)
سڏِنِ سَودائي، تنهن کي جيءَ جَهانَ جا،
جنهن سُتهِه ساڌَ سَنگَتِ جِي، رَجَ مَسِتَڪ
لائِي،
چَڙِهيو اَنَڀَئِه اَڇَ تي، وڃائي وائي،
سامي سَدائي سَنَمُکُ ڏِسي سُپِرين.
(58)
چَونِ لوڪَ چَرِيو، آءٌ سِياڻو سَنرو،
مِلي ساڌَ سَنگَتِ سان، ڪارجُ سَڀُ سَرِيو،
ڏِيو جوتِ آگَمَ جو، ٻِيائيءَ بِنان ٻَريو،
سامي ڏِسي ٺَريو، پنهنجي اَکيــٖـن پاڻَ کي.
(59)
جوڳي بيراڳي، پَنٿَ سَناسي سيوِڙا،
تَنِ مون ڪو هِڪڙو، سامي وَڏ ڀاڳي،
جَنهِن مِلي ساڌَ سَنگَتِ سان، مَمِتا مَتِ
تِياڳي،
ڏٺائين جاڳي، پانهنجي اَکيــٖـن پاڻَ کي.
(60)
مَنِيو جَنهن وَچَنُ، سامي ساڌ سَنگَتِ جو،
ڪَري وَسِ ويساهَ سان، ويٺو مَنُ پَوَنُ،
سَهَجـٖـي تنهن سيوَڪ تي پِرَڀُو ٿِيو پَرِسَنُ،
ڄاڻِي پَنهنجو جَنُ، پَلَڪَ پَرانهون نَه ٿِئي.
(61)
مَري جَنهن مَجو، وَتو ساڌَ سَنگَتِ جو،
سو سُتَهِه سَروپَ جو، ڇَڏي ڪينَ ڇَڄو،
ملي ڏِٺائين لَکَ ۾، سامي جڳُ سَڄو،
سَدا رَهي رَڄو، ڪَري نَه بيــٖـکَ بُکِيَنِ جان.
(62)
ايڪِتا ري اَنَنُ، ڪونَه ٻُڌوسي ڪاٿَئين،
مِلي ساڌ سَنگتِ سان، جَنهِين جِيتيو مَنُ،
سو پائي رامُ رَتَنُ، سامي چَڙِهيو سِيرَ تي.
(63)
اَچي پِئڙو رُکُ، جَنهِن جو ساڌَ سَنگَتِ سان،
مِٽِيو تَنهِن جي مَنَ مون، سامي سَنسو دُکُ،
پَرچي ڏِٺائين پاڻَ ۾، اَنَڀَئِه آتَم سُکُ،
سَدائين سَنَمُکُ، رَهي رَمِتا رامَ ۾.
(64)
جيڪو جَنُ ڪَري، سودو ساڌ سَنگَتِ سان،
هَلـٖـي ديسَ آگمَ ڏي، اَنَڀَئِي بارَ ڀَري،
واٽَ جگاتِي ڌَرَمَ راءِ، تنهن کي ڏِسي ڏَري،
اُلٽِي ڀيٽَ ڌَري، سامي سِرَڌا پِريتِ سان.
(65)
جيڪو پاڻُ ڇَڏي، اَچي ساڌَ سَنگَتِ ۾،
سامي تنهن کي سَتگرو، پَرِچي گَڏُ گَڏي،
اَنَڀَئِه ساڻُ اَڏي، سارُ لکائـٖـي سَڀَ ۾.
(66)
جيڪو پِيو ڪِرِي، سامي ساڌَ سَنگَتِ ۾،
مِليو تَنهن مائِل کي، سُتَهِه سِڌِ سُپِري،
سامي سُکَ سَنسارَ جا، وِيَس سَڀِ وِسِري،
اَچي ڪينَ ڦِري، جَنَمَ مَرَڻَ جي دُکَ ۾.
(67)
جيڪو پَئي ڪِري، سامي ساڌَ سنگَتِ ۾،
تنهن کي گَل لائي ڪن ڳوٺ جو، پَسي نِتُ پِرِي،
اَچي ڪينَ ڦِري، جَنَمَ مَرَڻ جي دُکَ ۾.
(68)
جيڪو سَرَنِ پِيو، اَچي ساڌ سَنگَتِ جي،
سَهجي تَنهِن شيوَڪَ جو، ڪارج سِڌِ ٿِيو،
ڏِسي ڪينَ ٻِيو، سامي سُپِرِيَنِ ري.
(69)
جيڪو سَرَنِ پَئي، سامي ساڌَ سَنگَتِ جي،
سو آتَمَ پَدَ آگمَ جِي، سُتَهِه سَنڌِ لَهي،
راتِيون ڏينهنَ رَهي، اَرڌ اُرڌَ جي وِچَ ۾.
(70)
جيڪي سَرَنِ پِيا، سامي ساڌَ سَنگَتِ جي،
تنِ جا پُوري سَتِ گُروءَ، ڪارِجَ سِڌِ ڪَيا،
ويري مِتِرَ ٿِيا، مَمَتِ نه رَهِي مَنَ ۾.
(71)
جيڪو لِنوَ لائي، سامي ساڌَ سَنگَتِ سان،
سو ڳَڻتِي ڪَڍِي مَنَ مون، پيرُ اَڳي پائي،
جِئڻَ مَرَڻَ دُکَ سُکَ جو، سنسو مِٽائي،
سَهَجـٖـي سَمائي، اَنَڀَئِه آتَمَ پَدَ ۾.
(72)
جنِ کي پريمَ پِياسَ، اَچي اَزِغَيبي لڳِي،
سي سامي سَدائي رَهَنِ، مايا مَنجِهه اُداسَ،
مِلي ساڌَ سَنگَتِ سان، ٿيا داسَنِ جا داسَ،
ڪَٽي اَوِديا ڦاسَ، سَڀَ گَهٽِ ڏِسَنِ سُپِرِين.
(73)
جنِ کي لڳِي لوڙ، سامي سُپيريَن جي،
سي مِلي ساڌَ سَنگَتِ سان، عاشِقَ اورِنِ اورَ،
پريتِ وَڌائي پانهِنجي، ماڻِنِ دَرِسَنِ دورَ،
جئين نَچَنِ مورَ، ٻُڌي گَرِجَ گَگَنَ جي.
(74)
جَنهن کي ٻاڻُ لڳو، سامي ساڌَ سَنگَتِ جو،
تنهن اُلٽي اَنتَرِ مُکِ ٿي، پَنهِنجو ڀولُ ڀڳَو،
چَڙِهيو انَڀَئِه اَڇَ تي، وِڪڻِي ڍورُ ڍڳو،
پِڇو ۽ آڳو، ڄاڻي سَڀُ سَڄَڻَ جو.
(75)
جَنهن کي لَپيٽيو، اَچي عَشِقَ عَجيبَ جـٖـي،
تَنهِن مِلي ساڌَ سَنگَتِ سان، سَنسو سَڀُ ميٽيو،
گِهڙي پانهنجي گَهرَ ۾، پُورَنُ پَدُ ڀيٽيو،
سُکي ٿي ليٽيو، سامي سُکَپَتِ سيجَ تي.
(76)
جَنهن کي آيو ساءُ، سامي ساڌَ سَنگَتِ جو،
اَچي لڳو تنهن جو، سَهَجي دلبَرُ داءُ،
ميٽي دُتِيا ڀاءُ، سَڀَ گَهٽِ ڏِسـٖـي سُپِرين.
(77)
جَنهن کي رَسُ آيو، ساڌَ سَنگَتِ جو،
تنهن موڙي مَنُ مَرَمَ سان، اَنتَرِ مُکِه لايو،
گُرَ گَمَ سارُ سَهي ڪَري، سَنسو مِٽايو،
ٺَهِيو ٺَهايو، سُکُ لَڌائين سَمَ جو.
(78)
جَنِهن کي رَسُ آيو، سامي ساڌَ سَنگَتِ جو،
تَنهِن پَرِچي لڌو پيچِرو، ٺَهيو ٺَهايو،
سُتَهِه سُمايو، ساکيءَ سار سَروپَ ۾.
(79)
جَنهن کي رَسُ آيو، سامي ساڌَ سَنگَتِ جو،
سو گَهرَ دَرَ سَڀُ ڇَڏي ڪَري، سُکَ ۾ سَمايو،
سَت گُرَ جو سايو، سَدا ڄاڻي سِرَ تي.
(80)
جَنهن کي آيو رَسُ، سامي ساڌَ سَنگَتِ جو،
مِٽِي تَنهِن جي مَنَ مون، ڪوٽَ جَنَم جي ڪَسُ،
نِرِمَلُ نارائِنَ جو، ٻُنڌٖي ٻولي جَسُ،
خاوندَ ٻاجهون خَسُ، خالي ڏسي ڪونَڪو.
(81)
جَنهن کي رَسُ آيو، سامي ساڌَ سَنگَتِ جو،
سو پِئـٖـي پِيالو پِريم جو، ڏيئي سڀ سَرَونسُ،
گُرَگَمَ ڪَڍٖي جيءَ مون، ڪوري ڪَلِپَتَ ڪَسُ،
ڳائِنِ تنهن جو جَسُ، ويدَ پُرانَ مِلي ڪري.
(82)
جَنهن کي رَنگُ لڳو، سامي ساڌَ سَنگَتِ جو،
اُٿي تنهِن جي گَهرَ مون، اَوِدِيا ڀوتُ ڀڳو،
ڪَيائين صافُ سَمُجَهه سان، پِڇو ۽ اَڳو،
وِڪِڻي ڍورُ ڍڳو، سُتَهِه مِليو سَروپَ
(83)
جَنهن کي ڳالِهه وَڻِي، سامي ساڌَ سَنگَتِ جي،
سو چَڙهيو اَنَڀَئِه آڇَ تي، وَٺي عَشِقَ اَڻي،
اُستَتِ نِندا لوڪَ جي، بيٺو سڀ کڻي،
توڙي پِني پَنجَ ڪَڻِي، ته ڀي راجا رانول ديسَ جو.
(84)
جَنهِين ڏيئي دِلِ، سامي ساڌَ سَنگَتِ ڪِي،
سو پَرچِي ڏِسي پورَبي، جُهڳـٖـي ۾ جِهل مِل،
چَڙِهي رَنگِ مَحَلِ، موجانَ ڪَري مَمَتَ ري.
(85)
جَنهِن کي لَڳو ڦَلُ، اَچي ساڌَ سَنگَتِ جو،
مِٽيو تنهن جي مَنَ مون، سامي سَڀُ خَلَلُ،
سُتَهه سِڌِ سَروپَ کون، پاسي ٿِي نَه پَلُ،
اٺ ئي پَهَرَ اَچَلُ، رَهي پَنهنجي حالَ ۾.
(86)
جَنهِن کي لڳو ڦَلُ، سامي ساڌَ سَنگَتِ جو،
باهِ نَه ساڙي تَنهِن کي، ٻوڙي سگهي نَه جَلُ،
اَندَرِ ٻاهَرِ نَڀَ جان، رَهي اَليپُ اَچَلُ،
ڄاڻِي مايا ڇَلُ، چَڙِهي ويٺو چَوڏولَ ۾.
(87)
اَچي لَڳو ڦلُ، ڪوٽَ جَنَمَ جي ڪَرَمَ جو،
مِلِي ساڌَ سَنگَتِ سان، ٿِيو مانُکَ جَنَمُ
سَڦَلُ،
ڏِٺو هِنَ اکِن سان، آتَمَ پَدُ اچَلُ،
سامي اَوِدِيا مَلُ، ريــٖـکَ نَه رَهِي مَنَ ۾.
(88)
اَچي لَڳو ڦَلُ، ڪوٽَ جَنَمَ جي ڪَرَمَ جو،
مِلي ساڌَ سَنگَتِ سان، ٿِئڙو مَنُ اَچَلُ،
مِٽائي خَلَلُ، سامي سُکِپَتِ روپُ ٿِيو.
(89)
جَنهين اوٽَ وَدِي، سامي ساڌَ سَنگَتِ جي،
آتَمَ پَدَ اَپارَ جِي، تَنهِن سَهَجـٖـي سُڌِ
لَڌي،
ڇِڪي ڳَنڍِ ٻَڌي، سَچِي سِڪَ پِرِيَنِ جِي.
(90)
جَنهين پَلِيو پاڻُ، مِلي ساڌَ سَنگَتِ سان،
سو سامي رکي ڪِينَڪي، ويرُ ڀاءُ ڪَنهِن ساڻُ،
سَڀَ جو گُهري ڪَلِياڻُ، پِريتَمُ ڄاڻِي پانهِنجو.
(91)
جَنهين دِلِ ڏيئي، سامي ساڌَ سَنگَتِ ڪي،
سَهَجـٖـي سُپيريَنِ جي، تَنهِن کي سُڌِ پيئي،
سَنسا سَڀيئي، ميٽي ويٺو مَحَلَ ۾.
(92)
جَنهِين دِلِ ڏيئي، سامي ساڌَ سَنگَتِ ڪي،
مِٽِيا تَنهِن جي مَنَ مون، سَنسا سَڀيئي،
ساڍٖي چَڙِهيو سِيرَ تي، اُروارُ پارُ ٻيئي،
دِرِشِٽِ وَڃي پيهئي، سُتَهِه سِدِ سَروپَ تي.
(93)
جَنهين دِلِ ڏيئي، سامي ساڌَ سَنگَتِ ڪي،
مِٽِيا تَنهِن جي مَنَ مان، سَنسا سَڀيئي،
سُتَهِه سِڌِ سَروپَ تي، دِرِشِٽِ وَڃي پيئي،
لوڪُ پَرِلوڪُ ٻيئي، ساڌٖي ويٺو سَمَ ٿِي.
(94)
جَنهِين پَرِچي پڳُ، کَنيو ساڌَ سَنگَتِ ڏي،
سامي تَنهِن شيوَڪَ کي، ٺڳـٖـي نَه اَوِدِيا ٺَڳُ،
ڪايا مايا ڪُلَ ۾، رَهـٖـي اَليپُ اَلڳُ،
جِيتـٖـي سارو جڳُ، پَهُتو پارِ پرِيَنِ کي.
(95)
جَنهِين پَليو پاڻُ، مِلي ساڌَ سَنگَتِ سان،
تَنهن جو ويري ڪونَه ڪو، صُلحُ ٿـٖـي سَڀَ ساڻُ،
سامي سَدائي رَهي، نانا کون نِرَٻاڻُ،
گاوي راڳُ ڪَلِياڻُ، چَڙِهي سَهَجَ سُميرَ تي.
(96)
جَنِين کي گاسِي، پيئي ساڌَ سَنگَتِ جي،
لاٿي تنِ ڳچيءَ مون، سامي جَمَ ڦاسي،
گِهڙي لَڌائون گَهرَ مون، اَلکُ اَبِناسي،
وَڃي ٿِيا واسي، ٻاريءَ بيگَمَ پورِ جا.
(97)
جَنين لِنوَ لائي، سامي ساڌَ سَنگَتِ سان،
تاتِ تَني جي مَنَ مون، مِٽي پَرائي،
رَهِي نَه رائي، چِنتا چاهَ اَندَرَ ۾.
(98)
جَنين لائي خاڪَ، سِرَ تي ساڌَ سَنگَتِ جي،
سَهَجـٖـي سُکُ سَروپَ جو، ماڻِنِ سي مُشتاقَ،
ٻُڌِي تَنِ جا واڪَ، سَهَجـٖـي مَنُ سيتَلُ ٿِيو.
(101)
جَنين لائِي خاڪَ، سِرَ تي ساڌَ سَنگَتِ جي،
سامي سُکُ سَروپَ جو، ماڻِنِ سي مُشتاقَ،
مُڪِتا ٿِيا مَنَنَ کون، تَنَ جا کولي تاڪَ،
ٻولِنِ اَنَڀَئِه واڪُ، سُڀاوَڪَ سَنسي ري. |
